बुटवल, ८ वैशाख-गुल्मीको चन्द्रकोट गाउँपालिकामा सोमबार दिउँसो भएको आगलागीमा १ जनाको मृत्यु भएको छ । चन्द्रकोट गाउँपालिका- ४, शान्तिपुर बसपार्कस्थित पूर्णबहादुर खनालको घरमा आगलागी भएको हो ।

आगलागीबाट पूर्णबहादुरका कान्छा छोरा १६ वर्षीय समिर खनालको मृत्यु भएको छ । पूर्णबहादुर र उनकी श्रीमती रूपा खनाल आगलागीमा परी गम्भीर घाइते भएका छन् ।

चन्द्रकोट गाउँपालिकाका अध्यक्ष द्रोणबहादुर खत्रीका अनुसार खाद्यान्न र ग्यासको समेत पसल रहेको साढे २ तलाको पक्की घर पूर्ण रूपमा क्षति भएको छ । घरको भुइँतलामा रहेका समिरको घटनास्थलमै मृत्यु भएको छ भने उनका बुबाआमा दुवै जना घाइते भएकाले उपचारका लागि पाल्पा मिसन अस्पतालमा पठाइएको अध्यक्ष खत्रीले जानकारी दिए ।

जेठो छोरा भने घरको माथिल्लो तलामा रहेका कारण छतबाट बाहिर हाम फालेर ज्यान जोगिएको अध्यक्ष खत्रीले जानकारी दिए । आगलागी कसरी भयो भन्नेबारे आफूलाई थाहा नभएको र ग्यासको सिलिण्डर पड्किँदा घरमा बढी क्षति भएको अध्यक्ष खत्रीले जानकारी दिए ।