विराटनगर, बैशाख ६–लक डाउनका कारण बारीमै तरकारी कुहिन थालेको सवत्र गुनासो पछि मोरङको कटहरी गाउँपालिकामा उत्पादित तरकारी संकलन गरिने भएको छ ।

प्रदेश १ को भूमि व्यवस्था तथा कृषि सहकारी मन्त्रालयमा सामाजिक विकास मन्त्री जीवन घिमिरेको अग्रसरतामा शनिबार भएको बैठकले कटहरीको तरकारी तत्काल उठाउने निर्णय गरेको हो । सामाजिक विकास मन्त्री घिमिरे, भूमि व्यवस्था तथा सहकारी राज्यमन्त्री राम राना, सरोकारवाला व्यक्तिहरुको उपस्थितिमा बसेको बैठकले तत्काल तरकारी उठाउने निर्णय गरेको हो ।

कटहरी स्थित तरकारी पकेट क्षेत्रका किसानहरुलाई नेकपा प्रदेश कमिटी सदस्य मृत्युञ्जयकुमार झाको समन्वयमा मन्त्रालयमै लगेर गरिएको छलफलमा प्रदेशभरी उत्पादित तरकारी बजार सम्म सहज रुपले पुर्याउनेसमेत निर्णय भएको हो ।

अब प्रदेशमा कृषकले उत्पादन गरेका तरकारी सहकारी र किसानको नेतृत्वमा बजार सम्म पुर्याएर उपभोक्तालाई सहजरुपले उपलब्ध गराइने भएको नेकपा प्रदेश कमिटी सदस्य झाले बताए ।

कटहरीका कृषकबाट तरकारी सहकारी संस्थाले संकलन गरि कटहरी स्थित तरकारी तथा फलफूल वजारमा जम्मा गरिने भएको छ । तरकारी बजारबाट उपभोक्ता समक्ष लैजाने निर्णय भएको तरकारी उत्पादक कृषि सहकारी संस्थाका अध्यक्ष धर्मलाल सिंहले जानकारी दिए ।