चितवन, ५ वैशाख-कर्तव्य ज्यान मुद्दा अभियोगमा थुनामा पठाउनुपर्ने कैदीलाई कोरोना भाइरस परीक्षण गरेर मात्र कैदमा पठाउन अदालतले आदेश दिएको छ ।चितवन जिल्ला अदालतले कर्तव्य ज्यान मुद्दामा तत्काल प्राप्त प्रमाणबाट दोषी देखिएको भन्दै १ जना अभियुक्तलाई पुर्पक्षका लागि थुनामा पठाउने आदेश दिएको छ ।

तर, इजलासले प्रतिवादीको कोरोना भाइरस परीक्षण भएको नदेखिएको भन्दै आरडीटी या पीसीआर परीक्षण गरेर मात्र थुनामा पठाउन भनेको छ ।

जिल्ला न्यायाधीश हेमन्त रावलको इजलासले छिमेकीको हत्या गर्ने चितवनकै हरिकृष्ण पाध्यालाई थुनामा पठाउने आदेश जारी गर्दै कोरोना संक्रमण भए नभएको यकिन गरेर मात्र कारागार पठाउन आदेश दिएको हो ।