काठमाडौं, ५ वैशाख-विश्वभर महामारीका रूपमा फैलिएको कोरोना भाइरसको संक्रमणलाई न्यूनीकरण गर्नका लागि सरकारले लकडाउन गरेपछि उपत्यकामा बसेर ज्याला मजदुरी गर्नेहरू समस्या परेका छन् । लगातारको लकडाउनका कारण कार्य क्षेत्र बन्द भएपछि खर्च अभावमा विभिन्न जिल्लाबाट आएका मजदुर, विपिन्न वर्ग, अध्ययनरत विद्यार्थी समस्यामा परेका हुन् ।

खर्च अभावमा उपत्यकामा बसेर खाना नसक्ने अवस्था आएपछि उनीहरू पैदलले गृह जिल्ला फर्किन थालेका छन् । सरकारले उनीहरूको विषयमा ध्यान नदिएको भन्दै विभिन्न क्षेत्रका व्यक्ति, राजनीतिक पार्टीका नेता, सरोकारवालाले ध्यानाकर्षण गराइरहेका छन् ।

यसैबीच राप्रपाका अध्यक्ष कमल थापाले यथास्थानमा राख्न नसक्ने, घर फर्कन सहयोग पनि नगर्ने कार्यले आमजनतामा सरकारप्रति नकारात्मक धारणा बढ्दै गएको भन्दै सरकारको आलोचना गरेका छन् । विभिन्न कारणले घर जान हिँडेकाको उचित व्यवस्थापन गर्न सरकारलाई आग्रह गरेका छन् ।

उनले प्रधानमन्त्री केपी शर्मा ओलीलाई ट्वीटमा मेन्सन गर्दै उपयुक्त र प्रभावकारी निर्णय नदेखिएमा त्यसलाई सच्याउँदै गतिशील बनाउनु लोकप्रिय नेतृत्वको गुण रहेन स्मरण गराएका छन् ।