खोटाङ, ४ वैशाख-बराहपोखरी गाउँपालिकामा काठमाडौँबाट फर्किएका ३ जनालाई क्वारेन्टाइनमा राखिएको छ । साइकलबाट ३ दिन लगाएर गाउँ आइपुगेका उनीहरूलाई वडा नम्बर–४, फाक्टाङस्थित बालकन्या मावि धर्तुङमा निर्माण गरिएको क्वारेन्टाइनमा मङ्गलबारदेखि राखिएको हो ।

उनीहरूलाई काठमाडौँबाट घर आउने क्रममा बाटैबाट क्वारेन्टाइनमा लगेर राखिएको गाउँपालिका उपप्रमुख गोमा मगरले बताइन् । यस्तै, विदेशबाटै फर्किएका खोटेहाङ गाउँपालिकाका ३ जनालाई पनि मङ्गलबारदेखि नै क्वारेन्टानमा राखिएको छ ।

वडा नम्बर–९ लिच्कीराम्चेको माविमा बनाइएको क्वारेन्टाइनमा २ जना र वडा नम्बर–७ खोटाङबजारस्थित स्वास्थ्यचौकीमा निर्माण गरिएको क्वारेन्टानमा १ जनालाई राखिएको हो ।

चितवनबाट पैदल यात्रा गर्दै घर आएका २ जनालाई क्वारेन्टाइनमा राखिएको लिच्की राम्चेका वडाध्यक्ष गोपीकृष्ण राईले बताए । उनीहरूसँगै गाउँ आएका अर्का व्यक्तिलाई पनि क्वारेन्टाइनमा राख्ने तयारी भइरहेको जनाइएको छ ।

दिप्रुङ चुइचुम्मा गाउँपालिकाको क्वारेन्टाइनमा पछिल्लो समय १ जना थपिएका छन् । बिराटनगरबाट गाउँ आएका एक युवालाई गत मङ्गलबारदेखि क्वारेन्टाइनमा राखिएका गाउँपालिका प्रमुख भूपेन्द्र राईले बताए ।

उनलाई वडा नम्बर–१ याम्खास्थित स्वास्थ्यचौकीको क्वारेन्टाइनमा राखिएको गाउँपालिकाले जनाएको छ । हाल याम्खा स्वास्थ्यचौकीको क्वारेन्टाइनमा ९ जना बसिरहेका छन् भने वडा नम्बर–५ सछितापोखरीस्थित जनचेतना प्रावि तृतीय भञ्ज्याङमा बनाइएको क्वारेन्टानमा ६ जना बसिरहेका छन् ।

दिप्रुङ चुइचुम्मा गाउँपालिकामा क्वारेन्टाइन बस्नेमा जिल्लाकै सबैभन्दा बढी १५ जना पुगेको छ । जिल्लाका हरेक स्थानीय तहले क्वारेन्टाइन बस्नेलाई खाने, बस्ने र स्वास्थ्य परीक्षणको व्यवस्था गरेको छ ।

हालसम्म हलेसी तुवाचुङ नगरपालिकामा ९ जना, केपिलासगढी गाउँपालिकामा ४ र साकेला गाउँपालिकामा १ जनालाई क्वारेन्टाइनमा राखिएको छ । २ नगरपालिका र ८ गाउँपालिका रहेको जिल्लामा अहिलेसम्म पनि विदेशबाट फर्किने व्यक्तिको सङ्ख्या यकिन भएको छैन ।

मुख्य नाका छलेर आउनेक्रम अझै जारी रहेकाले तथ्याङ्क आउन बाँकी रहेको कोरोना रोकथाम तथा नियन्त्रा जिल्ला समन्वय समितिका संयोजक एवम् जिल्ला समन्वय समिति खोटाङका प्रमुख बबि चाम्लिङले बताए ।

जिल्लाका १० स्थानीय तहमा ३७५ शैयाको क्वारेन्टाइन तथा २० शैयाको आइसोलेसन वार्ड तयार पारिएको छ । तर, हालसम्म छ गाउँपालिकाले विदेशबाट फर्किएका स्थानीय बासिन्दालाई क्वारेन्टाइनमा राख्न सकेको छैन ।

विदेशबाट फर्किएका अधिकांश व्यक्ति घरैमा बसिरहेका छन् । स्थानीय तहले विदेशबाट फर्किएका व्यक्तिलाई पनि सेल्फ क्वारेन्टाइन भन्दै घरमा बस्ने छुट दिएपछि क्वारेन्टाइनमा बस्नेको सङ्ख्या न्यून देखिएको हो । रासस