एजेन्सी, बैशाख ४-विश्वभर महामारीका रूपमा फैलिएको कोरोना भाइरसको संक्रमण भारतमा बढ्दो क्रममा छ। यहाँ संक्रकणका कारण ज्यान गुमाउनेको संख्या पनि बढिरहेको छ ।

भारतमा कोरोना भाइरसबाट मृत्यु हुनेको संख्या आजसम्म ४ सय २९ पुगेको छ । पछिल्लो ३ दिनमा ९० जनाको मृत्यु भएको छ । सबैभन्दा धेरै महाराष्ट्रमा १ सय ८९ जनाले कोरोना भाइरसको संक्रमणका कारण ज्यान गुमाएका छन् ।

मध्य प्रदेशमा ५५, गुजरात ३३, दिल्ली ३२, तेलंगाना १८, पंजाब १३, तमिलनाडु १४, राजस्थान ११, कर्नाटक १३, आंध्र प्रदेश १४, उत्तर प्रदेश ११ जनाको ज्यान गएको छ । यसबाहेक अन्य प्रदेशमा पनि ज्यान गएको भारतीय संचार माध्यमले उल्लेख गरेका छन् ।

यहाँ १२ अप्रिलमा सबैभन्दा धेरै संक्रमितको मृत्यु भएको थियो । १२ अप्रिलका दिन ३९ जना संक्रमितको मृत्यु भएको थियो । त्यसको अघिल्लो दिन ११ अप्रिलमा ६६ जनाको मृत्यु भएको थियो भने ९ अप्रिलमा ३४ जनाले कोरोना भाइरसको संक्रमणका कारण ज्यान गुमाएका थिए ।

भारतमा अहिले १२ हजार ४ सय ५६ संक्रमित भेटिएकोमा पछिल्लो २४ घण्टाको अवधिमा ८६ जना नयाँ संक्रमित थपिएका छन् । १ हजार ५ सय १३ जना भने उपचारपछि संक्रमणमुक्त भएर घर फर्किएका छन् ।