काठमाडौं, ४ बैशाख-प्रहरी दबंग शैलीमा उत्रिन खोज्दा डाक्टरमाथि नै लाठी चार्ज भएको छ । बुधबार राति त्रिवि शिक्षण अस्पताल महाराजगञ्जमा कार्यरत ३ जना डाक्टरमाथि महानगरीय प्रहरी वृत्त महाराजगञ्ज प्रहरीले लाठी चार्ज गरेको हो ।

प्रहरीको लाठी चार्जबाट शम्भु खनाल, तेजप्रसाद साह र विकाश साह घाइते बएका छन् । अस्पतालको ड्युटी सकेर साँझ घर फर्कने क्रममा कान्तिबाल अस्पताल पछाडिको ओरालोमा प्रहरीले उनीमाथि चार्ज गरेको हो ।

प्रहरीको लाठी चार्जबाट घाइते भएका शम्भु खनालका अनुसार आफूहरु डाक्टर भएको र ड्युटीबाट फर्किएको भन्दा भन्दै पनि प्रहरीले लाठी चार्ज गरेको बताए ।

‘हामी अस्पतालबाट घर फर्किदै थियाैं प्रहरीको भ्यान आयो । हाम्रो अगाडि पुगेपछि भ्यान रोकियो । भ्यानबाट दुईजना प्रहरी झरे को–हो तिमीहरु ? किन लकडाउनमा निस्केको भनेर सोधे । हामीले डाक्टर हो ।

ड्युटीबाट फर्किएको भन्दा भन्दै र परिचयपत्र देखाउँदा देखाउँदै पनि तीन चोटी लाठी हाने । प्रहरीको लाठीले डाक्टर चिन्दैन समेत भने । भ्यानमा प्रहरीको हाकीम जस्तो पनि थिए । ठ्याक्कै त हामीले चिनेनौ तर काधमा फुली भएकाहरु पनि थिए ।’

महानगरी प्रहरी वृत्तका प्रमुखमा हाल डीएसपी उमेश लम्साल रहेका छन् । उनीमाथि परिस्थितिको मूल्यांक नै नगरी आक्रामाक शैलीमा काम गरेर चर्चामा आउन खोजेको भन्दै चौतर्फी विरोध भएको छ ।