हेटौंडा, २ वैशाख-बागमती प्रदेशको मुकाम हेटौँडास्थित कीटजन्य रोग अनुसन्धान तथा तालिम केन्द्रमा रहेको प्रयोगशालामा गरिएको परीक्षणमा बीरगञ्जका २० जनाको स्वाब परीक्षण रिपोर्ट आएको छ । सोमबार बीरगञ्जका ३८ जनाको स्वाब परीक्षणको लागि हेटौँडा ल्याइएको थियो ।

वीरगञ्जमा ३ जना भारतीयलाई कोरोना संक्रमण पुष्टि भएपछि उनीहरूको सम्पर्कमा रहेका सोही क्षेत्रका अन्य थप ३८ जनाको स्वाब परीक्षण गरिएको हो । मंगलबार वीरगञ्जका २० जनाको स्वाब परीक्षणको रिर्पोट आएको सामाजिक विकास मन्त्रालयका वरिष्ठ स्वास्थ्य अधिकृत डा. पुरुषोत्तम सेढाईंले जानकारी दिए ।

उनका अनुसार सबैजनाको पिसिआर परीक्षणबाट आएको रिपोर्टमा कोरोना नेगेटिभ देखिएको छ । अन्य बाँकीको स्वाब परीक्षण भइरहेको डा. सेढाँईले बताए । वीरगञ्जका ३८ जनासहित ४१ जनाको आज रिपोर्ट आउने सेढाँईको भनाई छ ।

वीरगञ्जका जालिम मुखियासहित उनको परिवारका सदस्यको पनि स्वाब परीक्षणका लागि हेटौँडाको प्रयोगशालामा ल्याइएको प्रयोगशालाले जनाएको छ । उनको रिपोर्ट आउन बाँकी छ । मुखियाले नेपालबाट कोरोना बम भारततर्फ पठाउन सक्रिय रहेको भन्दै भारतीय संचारमाध्ययमले भ्रामक आरोप लगाएका थिए ।

हेटांडाको कोरोना परीक्षण प्रयोगशालाले हालसम्म १ सय ४९ जनाको पिसिआर परीक्षण गरिसकेको छ । मंगलबार दिउँसोसम्म १ सय २५ जनाको कोरोना परीक्षणको रिपोर्ट नेगेटिभ आएको छ । यसअघि वीरगञ्ज बस्ने ३ जना भारतीय नागरिकमा कोरोना पोजेटिभ भेटिएको थियो ।