जनकपुरधाम, २ वैशाख-कोरोना भाइरसविरुद्धको संघर्षमा ऐक्यबद्धता प्रदर्शन गर्न भन्दै जनमत पार्टीका अध्यक्ष डा. सिके राउतले आज शंख बजाएका छन् । उनले जनकपुरधामस्थित आफ्नै निवासमा शंख र घण्टी बजाएका छन् । शंख र घण्टी बजाएको दृश्य समाजिक सञ्जालमा पोष्टसमेत गरेका छन ।

उनकै आह्वानमा तराईका जिल्लामा शंख, घण्ट, थाली र ताली बजाइएको छ । उनका कार्यकर्ताले सामूहिक रूपमा विभिन्न जिल्लामा बिहान ७ बजेर ७ मिनेटमा थाली, ताली, घन्ट, शंख, सिटी बजाएका हुन् । डा. राउतले केही दिनअघि वैशाख २ गते शंख, घण्ट, ताली, सिटी बजाउन कार्यकर्तालाई आह्वान गरेका थिए ।

कोरोनाविरुद्ध लड्न अग्रमोर्चामा खटिएका स्वास्थ्यकर्मी, सुरक्षाकर्मी, समाजसेवीसहित सबैलाई धन्यवाद ज्ञापन गर्न एकता प्रदर्शन गरिएको राउतले बताएका छन् । यद्यपि तराईमा उनको अपिलअनुसार जनताले त्यस्तो गरेनन् । उनका केही कार्यकर्ता तथा समर्थकले भने घन्टा, थाल, शंखलगायत बजाएर उनलाई साथ दिए ।

एकअर्कासँग सुरक्षित भौतिक दूरी राखेर आआफ्नो घर, छत र बाल्कोनीबाटै एकता नाद गरौँ, जनचेतना फैलाउन आफ्नो समुदायमा लाउडस्पीकर एफएमबाट पनि उद्घोष गरौं, दिनभरिमा पटक पटक साबुनपानीले हाथ धोऔं, यथासम्भव घर भित्रै बसौं, लकडाउनको पालन गरौं, बाहिर निस्किनै परे भौतिक दूरी बनाएर मात्रै बसौं र हिँडौँ, डाक्टरले सुझाव दिए अनुसार मास्कको प्रयोग गरौं, स्वस्थ खाना खाऔं, शारीरिक अभ्यास गरौं, जस्ता आह्वान पनि उलने गरेका थिए ।