विराटनगर, माघ २७–प्रदेश १ को प्रदेशसभा बैठक आज पनि अवरुद्ध भएको छ । प्रमुख प्रतिपक्ष नेपाली कांग्रेसका सांसदले बैठक सुरु भएलगत्तै उठेर विरोध गरेपछि प्रदेशसभाको आजको बैठक स्थगित भएको हो । प्रदेशसभाको बैठक सुरु भएलगत्तै उठेर विरोध गरेका कांग्रेसका सांसदहरूलाई सभामुख प्रदीपकुमार भण्डारीले बस्न पटकपटक आग्रह गरेका थिए । भण्डारीले ललिता निवास प्रकरण प्रदेशसभाबाट समाधान हुने विषय नभएको र अदालतमा विचाराधीन मुद्दा पनि भएकाले बस्न आग्रह गरेका थिए ।

सभामुखको आग्रहविपरीत प्रतिपक्ष सांसदहरू निरन्तर उठेर विरोध गरिरहेपछि सभामुख भण्डारीले मंगलबार दिउँसो १ बजेसम्मका लागि बैठक स्थगित गरिएको जानकारी गराए । बालुवाटारस्थित ललिता निवास प्रकरणमा राजनीतिक प्रतिशोध साँध्ने गरी नियोजित रूपमा आफ्ना पार्टीका नेता विजयकुमार गच्छदारलाई मुद्दा चलाइएको भन्दै कांग्रेसले विरोध जनाउँदै आएको छ ।