काठमाडौं, २ बैशाख-शंकर ग्रुपका निर्देशक सुलभ अग्रवाल थप ५ दिन थुनामा रहने भएका छन् । २५ चैत २०७६ मा तापक्रम नाप्‍ने ‘थर्मल गन’मा कालोबजारी गरेको आरोपमा पक्राउ परेका उनी अहिले दरबारमार्ग प्रहरी कार्यालयको थुनामा रहेका छन् ।

जिल्ला प्रशासन कार्यालय काठमाडौंले पहिलो पटक ७ दिनका लागि अनुसन्धान गर्न म्याद थप गरेकामा मंगलबार पुन: ५ दिन म्याद थप गरेको हो ।

उनले करिब ३ हजार रुपैयाँ पर्ने थर्मल गनलाई १५ हजार रुपैयाँमा बिक्री गरेको सूचना आएसँगै प्रहरी अनुसन्धान व्युरोको टोली ग्राहक बनेर थर्मल गन किन्न गएको थियो । सुरुवातमा १६ हजार रुपैयाँ प्रति पिस भनेका उनले १५ हजार रुपैयाँमा दिन तयार भएका थिए । प्रहरीको टोलीले ६७ थान थर्मल गनसहित अग्रवाललाई नियन्त्रणमा लिएर दरबारमार्गको थुनामा राखेको छ ।