विराटनगर, चैत २३–उद्योग संगठन र मोरङ व्यापार संघले प्रदेश–१ सरकारलाई २४ लाख रुपैयाँ बराबरको खाद्य सामग्री हस्तान्तरण गरेका छन् । विराटनगरस्थित मुख्यमन्त्री तथा मन्त्रिपरिषद्को कार्यालयमा पुगेर संगठन र संघले आज संयुक्त रुपमा २४ लाख रुपैयाँ बराबरको खाद्य सामग्री हस्तान्तरण गरेका हुन् ।

लकडाउनका कारण कामविहीन भएका मजदुरहरु भोकै बस्न नपरोस् भनेर खाद्य सामग्री हस्तान्तरण गरेको उद्योग संगठन मोरङका अध्यक्ष भीम घिमिरेले बताए । संगठनका अध्यक्ष घिमिरे र मोरङ व्यापार संघका अध्यक्ष प्रकाश मुन्दडाले संयुक्त रुपमा मुख्यमन्त्री शेरधन राईलाई खाद्य सामग्री हस्तान्तरण गरे ।

सांकेतिक रुपमा केही बोरा मुख्यमन्त्रीलाई हस्तान्तरण गरिएको थियो । अन्य सामग्री गोदामबाट उपलब्ध गराइनेछ । प्रदेश–१ का २१ सय परिवारलाई उक्त खाद्य सामग्री वितरण गरिने ।

जसअन्तर्गत उद्योग वाणिज्य प्रतिष्ठान भएका क्षेत्रका विराटनगर, दुहबी, बूढीगंगा, कटहरी क्षेत्रमा ८ सय परिवारलाई वितरण गरिनेछ भने अन्य खाद्य सामग्री प्रदेश सरकारले आवश्यकताअनुसार अन्य क्षेत्रमा वितरण गर्ने अध्यक्ष घिमिरेले बताए ।

उनले लकडाउनका कारण दैनिक ज्याला मजदुरी गरेर खाने वर्ग सबैभन्दा बढी प्रभावित भएकाहरुलाई तत्काल प्रदेश सरकारमार्फत राहत वितरण गरेको जानकारी दिए । मुख्यमन्त्री राईले स्थानीय सरकारसँग समन्वय गरेर लक्षित वर्गलाई उद्योग संगठन र मोरङ व्यापार संघबाट प्राप्त राहत वितरण गर्ने बताए ।