विराटनगर, चैत २१–नेपाल कम्य्निष्ट पार्टी(नेकपा) बुढिगंगा गाउँ कमिटीले गाउँपलिकालाई राहत सामाग्री हस्तान्तरण गरेको छ । नेपाल सरकारले जारी गरेको लक डाउनका कारण दैनिक ज्यालादारी काम गर्दै आएका परिवारलाई हात मुख जोर्न समस्या पर्दै गएपछी स्थानीय नेपाल लिकर्स प्रा.लि.का अध्यक्ष तथा म्यानेजिङ डाइरेक्टर राजेशमान सिंह तुलाधरको सहयोगमा गाउँपालिकालाई नेकपा बुढीगंगाले राहत सामाग्री हस्तान्तरण गरेको हो ।

नेपाल लिकर्स प्रा.लि.बाट संकलित ५० बोरा चामल, २ बोरा नुन, ३ कार्टुन तेल गाउँपालिकाका अध्यक्ष बालचन्द्र माझीलाई हस्तान्तरण गरिएको हो । राहत सामाग्री नेकपा प्रदेश कमिटी सदस्य सत्यनारायण चौधरीले गाउँपालिका अध्यक्ष माझीलाई हस्तान्तरण गरे ।

साहत सामाग्री बुझ्दै गाउँपालिका अध्यक्ष माझिले संकटको अवस्थामा हस्तान्तरण गरिएको राहतका लागि नेपाल लिकर्स प्रा.लि.का अध्यक्ष तुलाधर, जनेरल म्यानेजर कलमप्रसाद सिटौलालाई धन्यवाद व्यक्त गरे । उनले राहतका लागि संयोजन गरेकोमा नेकपा बुढीगंगा गाउँ कमिटीलाई समेत आभार प्रकट गरे । उनले गाउँपालिकालाई उलपब्ध गराइएको राहत सामाग्री अत्यावश्यक ठाउँमा वितरण गरिने प्रतिवद्धतासमेत जनाए ।

राहत हस्तान्तरणमा गाउँपालिका उपाध्यक्ष अमृता गच्छदार लगायतका विभिन्न वडाका वडाध्यक्षहरुसहितका जनप्रतिनिधिहरुको उपस्थिती रहेको थियो ।

कोरोना भाइरस(कोभिड–१९) संक्रमणको जोखिम बढेपछि सरकारले घोषणा गरेको लकडाउनका कारण विपन्न तथा ज्यालादारी मजदुरका परिवार विचल्लीमा परेको भन्दै उनीहरुलाई राहत पुगोस् भनेर सामग्री संकलन गरी हस्तान्तरण गरिएको प्रदेश कमिटी सदस्य चौधरीले बताए ।