विराटनगर, चैत ११–पूर्वमन्त्री तथा प्रतिनिधिसभा सदस्य शिवकुमार मण्डलले आफुले प्राप्त गर्ने १ महिनाको तलब मात्र नभएर कोरोना भाइरस नियन्त्रण र रोकथामका लागि सरकार र पार्टीले गर्ने जस्तोसुकै निर्णय पनि कार्यान्वय गर्ने बताएका छन् ।

सञ्चारकर्मीहरुसँग कुरा गर्दै सांसद मण्डलले कोरोना संक्रमण फैलन नदिन र त्यसको रोकथाम र नियन्त्रणका लागि सरकारलाई जस्तोसुकै सहयोग गर्नसमेत तयार रहेको बताएका हुन् ।

नेपाल कम्युनिष्ट पार्टी (नेकपा) विराटनगर महानगर इन्चार्ज समेत रहेकाम सांसद मण्डलले विश्वभर माहामारीको रुपमा फैलँदै गएको कोरोना भाइरस(कोभिड–१९) को उच्च जोखिममा नेपाल समेत रहेकाले सरकारले र पार्टीको संसदीय दलले कोरोना भाइरसकाका विरुद्धमा गर्ने जस्तोसुकै निर्णय कार्यान्वयन गरिनुपर्ने बताए ।

‘यतिबेला मुलुक कोरोना भाइरसको त्रासमा छ । यस्तो अवस्थामा सवैले सरकारलाई सहयोग गर्नुपर्छ ।’ उनले भने,‘यसको नियन्त्रण र रोकथामका लागि मेरो १ महिनाको तलब मात्र होइन पार्टी र सरकारले गर्ने जस्तोसुकै निर्णय म मान्न तयार छु । र अरुले पनि अग्रसरता देखाउनुपर्छ ।’

उनले कोरोना भाइरसको संक्रमण फैलन नदिन सरकारले देश ‘लक डाउन’ गरेकाले हेल्चेक्र्याईँ नगर्न सर्वसाधारणलाई अपिल समेत गरेका छन् । सांसद मण्डलले कोरोना भाइरसको संक्रमणबाट बच्न घर वाहिर ननिस्कन र उच्च सतर्कता अपनाउन समेत सवैलाई आग्रह गरेका छन् ।