विराटनगर, चैत १०–प्रदेश नं. १ का मुख्यमन्त्री शेरधन राईले पूर्वी नाकामा अलपत्र परेका नेपाली नागरिकलाई प्रक्रिया पुराएर नेपाल प्रवेश गराउने बताएका छन् । पूर्वी नाका काँकडभिट्टाको स्थलगत निरीक्षण गर्दे मुख्यमन्त्री राईले अलपत्र नेपाली नागरिकलाई नेपाल प्रवेश गराउनका लागि केन्द्र सरकार र गृह मन्त्रालयसँग कुरा गरिएको जानकारी दिए ।

नाकाबाट आएका नेपालीहरुले क्वारेन्टाइनमा बस्नु पर्ने उनले बताए । मुख्यमन्त्री राईले संक्रमणबाट बच्न प्रदेश सरकारले स्थानीय सरकारलाई आवश्यक सहयोग गर्ने पनि बताए । उनले कोरोना भाइरसका संक्रमितहरुलाई उपचारका लागि प्रदेश १ मा एकसय वटा आइसोलेशन बेड तयार रहेको पनि बताए ।

सरकारले हिजो एक हप्ताका लागि चीन र भारतका सबै नाका बन्द गर्ने निर्णय गरेको थियो । नाका बन्द गर्ने निर्णयसँगै नेपाल र भारतबाट आवतजावत गर्ने सर्वसाधारणको नाकामा घुइँचो लागेको छ । रोकिएका नेपालीहरुले नेपाल प्रवेशका लागि सहजीकरण गरिदिन स्थानीय प्रशासनसँग अपिल गरेका छन् । सीमामा अलपत्र परेका अधिकांश भारतका विभिन्न सहरमा काम गरेर फर्किएका हुन् भने केही बंगलादेशबाट फर्किएका विद्यार्थीहरु हुन ।