विराटनगर, चैत ७–नेपाल औषधी व्यवसायी संघ मोरङले शुक्रवार विराटनगरको तीनपैनी चौकमा कोरोना भाइरस(कोभिड १९) को संक्रमण हुनबाट जोगाउने उद्देश्यले माक्स वितरण गर्नुको साथै कोरोना भाइरस सम्बन्धी सचेतनामुलक कार्यक्रम गरेको छ । संघका अध्यक्ष लक्ष्मी तिम्सिनाको नेतृत्वको टोलीले तीनपैनी चौकमा करिब ८ सय माक्स वितरण गर्यो ।

माक्स वितरण गर्दै उनिहरुले सर्वसाधारणलाई भाइरसबाट जोगिन माक्स लगाउने वानी गर्नुपर्ने तथा संक्रमणबाट जोगिने उपायका विषयमा सचेतना जगाउने पर्चा समेत वितरण गरेका थिए । सोहि अवसरमा संघले भाइरसको संक्रमण सबैभन्दावढी हातमा हुने भएकोले हातलाई संक्रमणबाट मुक्त राख्न सर्वसाधारणहरुलाई सेनिटाइजर लगाइदिएका थिए ।

त्यसका साथै संघको टोलीले कोरोना भाइरसबाट जोगिन र भइहालेको अवस्थामा अपनाउनुपर्ने तरिका र उपचार पद्धती उल्लेखित पर्चा वितरण गरेको थियो । कोरोना भाइरस सम्बन्धी सचेतना तथा सामाग्री वितरण कार्यक्रममा विराटनगर उपमहानगरपालीकाकी उपप्रमुख इन्दिरा कार्कीले समेत लाइनमा बसेर हातमा सेनिटाइजर लगाउँदै माक्स लिएर लगाएकी थिइन् । उनले केहि समय बसेर सर्वसाधारणलाई समेत माक्स वितरण गरेकी थिइन् ।

कार्यक्रममा संघका उपाध्यक्ष देशबन्धु ढकाल, महासचिव दीनेश ठाकुर, सदस्यहरु सरिता चौधरी,प्रकाश धिमाल, गणेश थापालगायत औषधी व्यवसायीहरुले सर्वसाधारणलाई माक्स वितरण, सेनिटाइजर हातमा लगाइदिने तथा पर्चा वितरण गरेका थिए । उनिहरुले हात नमिलाऔं,नमस्कार गरौं नारा लेखिएको पम्प्लेट टाँसेर सचेतना जगाउने समेत काम गरेका थिए ।

संघले गएको बुधवारपनि विराटनगरको ट्राफिक चौकमा कोरोना भाइरसको संक्रमणबाट सर्वसाधारणलाई जोगाउने उद्देश्यले १ हजार थान माक्स वितरण गर्नुकासाथै हातमा सेनिटाइजर लगाइदिने र सचेतनामुलक पर्चा वितरण गरेको थियो । उक्त कार्यक्रममा सर्वसाधारणको अत्यधिक भिड लागेपछि प्रहरीले लाईन लगाएर व्यवस्थित गराउनु परेको थियो ।