आयात बढ्न थालेपछि शोधनान्तर बचत घट्दो - News Birat

आयात बढ्न थालेपछि शोधनान्तर बचत घट्दो

न्यूज विराट

काठमाडौं, चैत ५–चालू आर्थिक वर्षको ७ महिनाको अवधिमा विदेशी वस्तुको आयात बढ्दै गएपछि शोधनान्तर बचत भने घट्न थालेको देखिएको छ । पछिल्लो १ महिनामा मात्र करिब ५ अर्ब रुपैयाँले शोधनान्तर बचत घटेको छ । देशबाट बाहिरिने तथा देशभित्र भित्रिने रकमको अन्तरलाई शोधनान्तर भनिन्छ । नेपाल राष्ट्र बैंकका अनुसार चालू आर्थिक वर्षको ६ महिनाको अवधिमा २६ अर्ब ६५ करोड रुपैयाँ बचतमा रहेको शोधनान्तर ७ महिनाको अवधिमा भने २१ अर्ब ६१ करोड रुपैयाँ बचतमा झरेको छ ।

विदेशबाट आउने वस्तुको आयात बढ्दै गएपछि शोधनान्तर बचत घट्दै गएको देखिएको छ । चालू आर्थिक वर्षको पहिलो महिना गत वर्षको तुलनामा आयातीत सामान ११ प्रतिशतले घटेकामा ७ महिनाको अवधिमा गत वर्षको सोही अवधिको तुलनामा ३ प्रतिशतले मात्र कम रहेको छ । ७ महिनाको अवधिमा ८ खर्ब ३ अर्ब ६० करोड रुपैयाँको सामान आयात भएको छ भने ६४ अर्ब ९७ करोड रुपैयाँको निर्यात बढेको छ ।

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles