विराटनगर, फागुन २२–यही शनिबारदेखि धरान–४ स्थित भेडेटारबाट देविथानसम्म जिप फ्लाइङको व्यवसायिक रुपमा सुरुवात हुने भएको छ । करिब ७ महिना अघिदेखी वल्र्ड वाइड ग्रुप नेपाल प्रा.लि.धरान–४ ले निर्माण सुरु गरी जिप फ्लाइङको सुरुवात गर्न लागेको हो । जिप फ्लाइङको उद्घाटन एक नं. प्रदेशका मुख्यमन्त्री शेरधन राईले गर्ने जनाइएको छ ।

प्रालिका सञ्चालक केदार थापा, यम राई, डोलिका लिम्बू, विवस भण्डारीले भेडेटारमा २ वर्ष अध्ययन गरेर जिप फ्लाइङको सुरुवात गरेका हुन् । उनीहरुले यस अघि धुलिखेलमा व्यवसायिक रुपमा जिप फ्लाइङ गरिरहेका थिए ।

करिब ३ करोडको लगानीमा भौतिक निर्माण सम्पन्न गरेको प्रालिका सञ्चालक केदार थापाले बताए । जीपलाइन भेडेटारदेखि देविथानसम्म ६ सय ५० मिटर लामो छ । जसमा फ्लाइङ गर्न ३०–४० सेकेण्ड लाग्ने सञ्चालक थापाले बताए ।

उनका अनुसार जिपफ्लाइङमा ३ प्रकारको सुविधा हुनेछ । जसमा क्लासिक, सुपरम्यान र कपल जिपलाइन हुन्छ । क्लासिकमा एकजना बसेर फ्लाइङ गर्छन् भने सुपरम्यानमा उडेझै गरी फ्लाइङ गर्नसकिने छ ।

त्यस्तै कपलमा जोडीले बसेर फ्लाइङ गर्न सक्नेछन । क्लासिकको १२ सय, सुपरम्यानको १५ सय र कपलको १८ सय रुपैया मूल्य तोकिएको छ । जिप फ्लाइङमा १० वर्षदेखि ७५ वर्ष उमेरसम्मकाले मज्जा लिन सक्नेछन । जिप फ्लाइङमा साहसिक पर्यटकहरुको ५ लाखको बिमा पनि गरिने संचालकले जनाएका छन् ।