धनुषा, फागुन १५–नेपाल सरकारले आउँदो असारबाट रेल चलाउने आन्तरिक तयारीमा जुटेका छन् । भारतको जयनगरदेखि धनुषाको कुर्थासम्म पहिलो चरणमा रेल चलाउने तयारी भएको रेल विभागका महानिर्देशक वलराम मिश्रले बताए । रेल विभागले रेल सञ्चालनका लागि आवश्यक पर्ने केही प्राविधिकमध्ये ९ पदका लागि २६ जनाको लागि विज्ञापनसमेत गरी सकेको छ ।

रेल विभागले माग गरेको कर्मचारीको योग्यता नेपालीमा नदेखिएकाले गर्दा चाँडै विभागले विदेशी कर्मचारीको लागि पनि सूचना जारी गर्ने उनले बताए । रेल सञ्चालन गर्न हाल करिब २ सय जनशक्तिको अभाव भए पनि पहिलो चरणमा विभागले २६ जनाको मात्रै माग गरिएको जानकारी दिएको छ । अन्य कर्मचारीको लागिसमेत चाँडै विज्ञापन गरिने महानिर्देशक मिश्रले बताए ।

नेपालले भारतीय कम्पनीसँग रेलको दुई इन्जिनलगायतको डब्बा खरिद गरिसकेको छ । रेल बनाउने भारतीय कम्पनीले नेपालको लागि रेल निर्माण गरिसकेको तर, प्राविधिक समस्याले गर्दा रेल नेपाल आउन नसकेको बताइएको छ ।