विराटनगर, फागुन १–नेपाल उद्योग वाणिज्य महासंघको उपाध्यक्ष किशोर प्रधानले आगामी निर्वाचनका लागि वरिष्ठ उपाध्यक्ष पदमा उम्मेदवारी दिने घोषणा गरेका छन् । आज विराटनगरमा उद्योग संगठन र मोरङ व्यापार संघले संयुक्त रुपमा आयोजना गरेको कार्यक्रममा प्रधानले वरिष्ठ उपाध्यक्षको उम्मेदवारी दिने घोषणा गरेका हुन् । विगत २६ वर्ष देखि उद्योगी व्यवसायीका समस्या उठाउँदै आएकाले अझै एक पटक उद्योग व्यवसाय क्षेत्रको सेवा गर्ने मौका उद्योगी व्यवसायीसँग आफूले मागेको प्रधानले बताए ।

आफूले निर्वाचन जिते उद्योग बाणिज्य महासंघमा १० वर्षमा नभएको काम तीन वर्षमा गरेर देखाउने दाबी प्रधानको छ । नेपाल उद्योग बाणिज्य महासंघका बरिष्ठ उपाध्यक्ष शेखर गोल्छाले काममा टिम स्प्रिट बढाउन पनि बरिष्ठ उपाध्यक्षमा किशोर प्रधानलाई आफूले रोजेको बताए । उनले महासंघको गरिमा बढाउन आफ्नो नेतृत्वको टिमले काम गर्ने स्पष्ट पारे ।

नेपाल उद्योग बाणिज्य महासंघका निवर्तमान अध्यक्ष पशुपति मुरारकाले उद्योग बाणिज्य महासंघले व्यवसायीका समस्या समाधानमा भूमिका खेल्न नसकेको गुनासो गरे । ‘महासंघकालाई बचाउनै पर्ने अवस्था सृजना भएको छ । काम गर्र्ने सक्षम टिम तयार पानु पर्ने अवश्यकता छ ।’ उनले भने,‘ महासंघमा सुद्धिकरण पनि जरुरी रहेको छ । त्यसैले यो टिमको महासंघमा आवश्यकता छ ।’

उद्योग संगठन मोरङका अध्यक्ष भीम घिमिरेले प्रभान प्रदेश १ का साझा उमेद्वार भएकाले सबैलाई सहयोग गर्न आग्रह गरे । मोरङ व्यापार संघ र उद्योग संगठन मोरङले संयुक्त रुपमा आयोजना गरेको घोषणा कार्यक्रममा देशभरबाट जिल्ला तथा नगर उद्योग बाणिज्य महासंघका अध्यक्ष तथा प्रतिनिधिहरूको सहभागिता थियो ।