धनगढी, माघ २९–कैलालीको धनगढीमा नक्कली प्रहरी बनेर रकम असुल्ने ३ जना पक्राउ परेका छन् । बझाङको खप्तड छान्ना गाउँपालिका–१ घर भई धनगढी उपमहानगरपालिका– ७, मनहेरा बस्ने ३२ वर्षीय सनम भण्डारी, धनगढी उपमहानगरपालिका–५, हसनपुरका ३५ वर्षीय गौरव हमाल र कञ्चनपुर पुनर्वास नगरपालिका–५ घर भई धनगढी उपमहानगरपालिका–१ बस्ने ३३ वर्षीय किशन सिजापतिलाई पक्राउ गरिएको प्रहरीले जनाएको छ ।

जिल्ला प्रहरी कार्यालय कैलालीका प्रहरी प्रवक्ता प्रहरी नायव उपरीक्षक दक्षकुमार बस्नेतका अनुसार माघ २ गते धनगढी उपमहानगरपालिका– ३, बडहरा घर भई मिलन चोकस्थित चन्द्र भान शर्माले सञ्चालन गरेको रिक्सा, साइकल मर्मत पसलबाट उनीहरूले रकम असुली गरेको भन्दै उजुरी परेपछि उनीहरूलाई पक्राउ गरिएको हो ।

शर्मालाई भारतीय नम्बर प्लेटको मोटरसाइकल चोरीको हो र आफूहरू जिल्ला प्रहरी कार्यालयबाट आएका हौँ भन्दै ३ जनाले ४ हजार ५ सय रकम असुली गरेको भन्दै उजुरी आएकाले उनीहरूलाई पक्राउ गरिएको प्रहरी नायव उपरीक्षक बस्नेतले बताए ।