जनकपुर, माघ २४–अख्तियार दुरूपयोग अनुसन्धान आयोगले बुधबार विशेष अदालतमा दर्ता गरेको काठमाडौंको ललिता निवास जग्गा प्रकरणसम्बन्धी भ्रष्टाचार मुद्दामा प्रदेश २ का दुई जना सचिव परेपछि कामकाज प्रभावित भएको छ । प्रदेश २ को मुख्यमन्त्री तथा मन्त्रिपरिषदको कार्यालयका सचिव शंकरप्रसाद सुवेदी र सोही कार्यालयका अर्का सचिव तेजराज पाण्डे निलम्बनमा परेका छन् । निलम्बनमा परे पनि दुवै सचिवको कोठाअगाडिको नेमप्लेट हटाइएको छैन ।

मुख्यमन्त्री कार्यालयका अनुसार दुवै सचिवले गर्ने कार्यहरू रोकिएको छ भने प्रमुख कार्यहरू प्रदेशका प्रमुख सचिव रामकृष्ण सुवेदीले गरिरहेका छन् । निलम्बनमा परेका दुवै जना नेपाल सरकारमा सहसचिव रहे पनि प्रदेश २ मा उनीहरू सचिव पदमा कार्यरत थिए । अख्तियारले विशेष अदालतमा मुद्दा दर्ता गरेसँगै सुवेदी र पाण्डे पनि निलम्बनमा परेका छन् ।

अख्तियारले सुवेदीविरूद्ध ९ करोड ६५ लाख ७६ हजारको बिगो माग गरी मुद्दा दर्ता गरेको छ । सुवेदी भूमिसुधार कार्यालयका भूमिसुधार अधिकारी रहेको बेला ललिता निवास जग्गामा भ्रष्टाचार गरेको आरोप अख्तियारले लगाएको छ । त्यसैगरी, पाण्डेविरुद्ध ७ करोड ८ लाख ४८ हजार बिगोसहितको मुद्दा दर्ता गरिएको छ । पाण्डे भूमिसुधार तथा व्यवस्था मन्त्रालयमा सहसचिव पदमा कार्यरत रहेको बखत सो जग्गासम्बन्धी निर्णयमा सहभागी थिए । सुवेदी प्रदेश २ मा आएको ६ महिना र पाण्डे २ महिना मात्र भएको थियो । प्रदेश २ को मुख्यमन्त्री तथा मन्त्रिपरिषदको कार्यालयमा अब फेरि सचिवको कमी भएको छ ।