डडेल्धुरा, माघ १७–नेपाल कम्युनिस्ट पार्टी (नेकपा)का आलिताल गाउँपालिका कमिटी अध्यक्ष ज्ञानेन्द्र जोशीलाई अज्ञात समूहले अपहरण गरी निर्घात कुटपिट गरेको छ । उनलाई अज्ञात समूहले आज अपहरण गरी कुटपिट गरेको हो । आलिताल गाउँपालिका –३ को वडा बैठकमा सहभागी हुन बैठकस्थलतर्फ जाने क्रममा उनलाई अपहरण गरी कुटपिट गरेको प्रहरीले जनाएको छ ।

आलितालभन्दा करिब ५ सय मिटरमाथि चौरवण्डले भन्ने स्थानबाट मुकुण्डोधारी समूहले अपहरण गरी कुटपिट गरेर गम्भीर घाइते बनाएको आलिताल प्रहरी चौकीका प्रहरी सहायक निरीक्षक कमलप्रसाद जोशीले जानकारी दिए । अज्ञात समूहको कुटपिटबाट जोशी गम्भीर घाइते भएका छन् । उनको खुट्टा भाँचिएको छ भने टाउको र हातमा गम्भीर चोट लागेको छ । उनलाई एम्बुलेन्समार्फत धनगढी लगिएको छ । जोशी सवार से ६ प ७९२६ नम्बरको मोटर साइकलमा पनि तोडफोडा गरिएको प्रहरीले जनाएको छ । प्रहरीका अनुसार मोटरसाइकमा आगजनीको समेत प्रयास गरिएको छ ।

जोशीसँगै मोटरसाइकमा सवार नेकपा आलिताल गाउँपालिका कमिटी सदस्य चित्र बोहरा भागेर अपहरण र कुटपिटबाट जोगिएकी छन् । प्रहरीले मुकुण्डो धारी समूहको खोजीकार्य तीव्र पारेको छ । भित्रीमधेस क्षेत्र सरकारद्वारा प्रतिबन्धित नेत्रविक्रम चन्द ‘विप्लव’ समूहको प्रभाव क्षेत्रका रूपमा पनि लिइन्छ ।