काठमाडौं, पुस २२–चालू आर्थिक वर्षको मंसिरसम्ममा १ अर्ब ८६ करोड रुपैयाँबराबरको अलैंची निर्यात भएको छ । यो परिमाण गत आवको सोही अवधिको तुलनामा ५०.७ प्रतिशत धेरै हो । गत आवको पहिलो पाँच महिनामा १ अर्ब २३ करोड रुपैयाँबराबरको अलैंची निर्यात भएको थियो । समीक्षा अवधिमा कुल निर्यातमा अलैंचीको हिस्सा ३.९ प्रतिशत छ ।

नेपालको पूर्वी इलाम, पाँचथरलगायतका जिल्लामा बढी अलैंची उत्पादन हुन्छ । कृषि उपजमा अलैंचीलाई सरकारले निर्यात प्राथमिकताको वस्तुमा राखेको छ । गत वर्षभरमा ४ अर्ब २८ करोडको अलैंची निर्यात भएको थियो । चालू आवको पाँच महिनामा १ अर्ब ४५ करोडको चिया, ५१ करोडको जडिबुटी र २३ करोड ६२ लाख रुपैयाँबराबरको अदुवा निकासी भएको व्यापार तथा निकासी प्रवर्धन केन्द्रले जनाएको छ ।

नेपालको निकासी व्यापारमा भारत, अमेरिका, जर्मनी, बेलायत, टर्की, चीन, बंगलादेश, फ्रान्स, जापान, इटाली, क्यानडा, अस्ट्रेलिया, स्विट्जरल्यान्डलगायत देशको हिस्सा धेरै छ । नेपालबाट पाम आयल, पोलिस्टर तथा अन्य धागो, ऊनी गलैंचा, भटमासको तेल, तयारी पोसाक, जुट तथा जुटका सामान, अलैंची, जुस, चिया, कपडा, फलाम तथा स्टिल, फेल्ट र पस्मिना सल निर्यात हुन्छ । निर्यात व्यापारमा मुख्य हिस्सा पाम आयलको २४ प्रतिशत छ ।