काठमाडौं, पुस १३–कमल थापा नेतृत्वको राप्रपाले हिन्दु राष्ट्र र राजसंस्थासहितको लोकतन्त्रप्रति प्रतिवद्धता जनाएर पशुपतिशमशेर राणा र डा.प्रकाशचन्द्र लोहनी नेतृत्वको राप्रपा (संयुक्त)लाई एकता प्रक्रियामा सहभागी हुन आह्वान गरेको छ । राप्रपाको केन्द्रीय पदाधिकारी र कार्य सम्पादन समितिको बैठकले प्रतिनिधिसभा, प्रदेश सभा र स्थानीय तहको उपनिर्वाचनमा बलियो संगठन नभएका कारण हार व्यहोरेको निष्कर्षसमेत निकालेको छ । बैठकले २७ पुसको राष्ट्रिय एकता दिवस र पृथ्वी जयन्तीमा सार्वजनिक बिदा दिनसमेत माग गरेको छ ।

राप्रपाले यस विषयमा प्रधानमन्त्रीलाई ज्ञापनपत्र दिने र संसदमा पनि आवाज उठाउने भएको छ । राप्रपाले सो दिन केन्द्रीय, प्रादेशिक र स्थानीय तहमा भव्य रूपमा पृथ्वी जयन्ती मनाउने निर्णय गरेको छ । राप्रपाले विकास र सहयोगसम्बन्धी अमेरिकी निकाय मिलेनियम च्यालेन्ज कर्पोरेसन (एमसीसी) सँगको अनुदान सहायता सम्झौता प्रस्ताव तत्काल संसदबाट पारित गर्न माग पनि गरेको छ । नेपालले लाभ लिन सक्ने सम्झौता भन्दै यसलाई पारित गर्न ढिलाइ गरिनु आश्चर्यजनक भन्दै राप्रपाले चालू संसद अधिवेशनमै एमसीसी अनुमोदन गर्न माग गरेको छ ।