विराटनगर । झापा, मोरङ, सुनसरी, ताप्लेजुङ र भारतको सिक्किम तथा आसाममा बसोबास गर्ने श्रेष्ठ समुदायको धौंखल वंशको १८ औं भेला सम्पन्न भएको छ । मोरङको रतुवामाई नगरपालिका–५ स्थित सौठा बजारमा आयोजित यस कार्यक्रममा परम्परागत संस्कृति झल्किने विविध गतिविधिहरू सहित बुधबार वंश भेला उल्लासपूर्ण वातावरणमा समापन गरिएको हो ।
धौंखल वंश सेवा समितिका अध्यक्ष पदमकुमार श्रेष्ठका अनुसार अक्षय तृतीयाको शुभ अवसर पारेर प्रत्येक वर्ष यस्तो वंश भेला आयोजना गरिँदै आएको बताउनुभयो । ‘हाम्रो वंशको एकता र सांस्कृतिक सम्बन्धलाई अझ मजबुत बनाउने मुख्य उद्देश्यका साथ यो वार्षिक भेला आयोजना गरिएको हो,’ अध्यक्ष श्रेष्ठले भन्नुभयो ।
कार्यक्रममा विशेष उपलब्धि हासिल गरेका पाँच जना विशिष्ट ज्येष्ठ व्यक्तित्वलाई सम्मान गरिएको थियो । उर्लाबारीका हरिराज श्रेष्ठ, मधुमल्लाका टेकबहादुर श्रेष्ठ, डाँगीहाटका खड्गबहादुर श्रेष्ठ, ताप्लेजुङकी गौरीमाया श्रेष्ठ र पथरीकी लक्ष्मीमाया श्रेष्ठलाई सम्मानित गरिएको हो ।
समारोहमा बोल्दै अध्यक्ष श्रेष्ठले धौंखल वंशले आफ्नो समुदायको उत्थानका लागि मात्र नभई सम्पूर्ण समाजको विकासमा समेत योगदान पु¥याउने प्रतिबद्धता व्यक्त गर्नुभयो । ‘हामी एकताबद्ध भएर समाज रूपान्तरणका कार्यमा अग्रसर हुनेछौँ,’ उहाँले भन्नुभयो ।
समितिका सचिव प्रेम श्रेष्ठले संस्थागत गतिविधिको प्रतिवेदन प्रस्तुत गर्दै गत वर्ष गरिएका उपलब्धिहरू र आगामी वर्षका लागि योजनाहरू बारे जानकारी गराउनुभयो ।
भेलामा झापा, मोरङ, सुनसरी, ताप्लेजुङ र भारतको सिक्किम तथा आसामका विभिन्न क्षेत्रबाट आएका धौंखल वंशका सदस्यहरूको उपस्थिति रहेको थियो । कार्यक्रममा परम्परागत सांस्कृतिक प्रस्तुति, वंशको इतिहास झल्किने प्रदर्शनी र सामूहिक भोजको आयोजना गरिएको थियो । संस्थाले हालसम्म ६५ घरपरिवारका ५ सय बढी सदस्यहरूलाई एकीकृत गरेको छ र भविष्यमा सामाजिक सेवा, सांस्कृतिक संरक्षण र युवा सशक्तीकरणका क्षेत्रमा थप कार्यक्रमहरू आयोजना गर्ने जनाएको छ ।