विराटनगर । नेपाल चिकित्सक संघ कोशी शाखाका पदाधिकारीहरुले पुर्व राष्ट्रपति विद्या देवी भण्डारीसंग भेटेर विभिन्न तीन बुद्धे माग राखेका छन् । उनीहरुले विराटनगरमा पुर्वराष्ट्रपति भण्डारीसँग भेटेर विभिन्न मागसहितको ज्ञापनपत्र बुझाएका हुन् ।

पछिल्लो समयमा रेजिडेन्ट डाक्टरहरुको निर्वाह भत्ताको विवादले चलिरहेको आन्दोलन, रेजिडेन्ट डाक्टरहरुले गरेको आत्महत्या, चिकित्सकहरुको विदेश पलायन तथा जनसंख्या बृद्धिसंगै चिकित्सकहरुको नयाँ दरबन्दी थप्नुपर्ने लगायतको माग राखेर पुर्वराष्ट्रपति भण्डारीलाई भेटेको नेपाल चिकित्सक संघ कोशी शाखाका महासचिब डा. बालकृष्ण साहले जानकारी दिए ।

२०४८ सालमा कायम गरिएको दरबन्दीमा पनि करिब ५० प्रतिशत रिक्त रहेकोमा चाँडै लोक सेवामा मार्फत पदपूर्ति गरिनुपर्ने माग राखिएको संघका अध्यक्ष डा. राजेन्द्र चौधरीले बताए ।
संघले पुर्व राष्ट्रपति भण्डारीलाई बुझाएको आधिकारिक ध्यानाकर्षण पत्रमा मुख्य ३ समस्या औल्याएका छन् । जसमा पहिलो र ज्वलन्त मुद्दा आवसीय चिकित्सकहरुको समस्यालाई उजागर गरेको छ । ‘समस्या मुलुकमा आवसिय चिकित्सकहरुको निर्वाह भत्ताको सन्दर्भमा मुलुक भरी आवसिय चिकित्सकहरु को आन्दोलन चलिनै रहेको छ । निर्वाह भत्ताको सन्दर्भमा एकातिर कुरा छदैछ अर्को तर्फ आवसिय चिकित्सकहरुको काम गर्ने डियुटि आवरका साथै चिकित्सकको स्वास्थ्य अवस्थाको समेत ख्याल गर्नुपर्ने जरुरी देखिन्छ । आवसिय चिकित्सकहरुको मानसिक स्वास्थ्यको सन्दर्भमा हेर्दा हालै पन्ध्र दिनको अन्तरालमा नेपालको प्रतिष्ठित दुई सस्थामा दुई आवसिय चिकित्सकहरुले आत्महत्या गरेको कुरा लाई गम्भिर रुपमा हेर्नूपर्ने जरुरी छ,’ ज्ञापनपत्रमा उल्लेख छ ।
पुर्वराष्ट्रपति भण्डारीलाई संघका तर्फबाट अध्यक्ष डा. राजेन्द्र चौधरी, महासचिव डा. बालकृष्ण साह, सदस्य द्वय रितेश कुमार सिंह र प्रेक्षा दली, कल्चर समितिका डा. मिरा आचार्य र सल्लाहकार डा. मोहन खड्काले भेटेका थिए ।