विराटनगर । नेपाल प्रिमियर लिग (एनपिएल) मा सबैभन्दा धेरै विकेट लिने नेपाली बलर बनेका ललित राजवंशीलाई गृह नगरी विराटनगरमा भव्य स्वागत गरिएको छ ।

खेलकुद संग सम्बन्धीत विभिन्न संघसंस्था र खेलकुद क्षेत्रमा लागेका व्यक्तिहरुले राजवंशीलाई मंगलबार विराटनगर विमानस्थलमा पुगेर भव्य रुपमा स्वागत गरेको हो ।

विमानस्थलमा स्वागत गर्न कोशी प्रदेशका पूर्व स्वास्थ्यमन्त्री जयराम यादवदेखि मिल्स क्रिकेट क्लब एण्ड एकेडेमीका पदाधिकारी तथा नेपाल खेलकुद महासंघका सचिवालय सदस्य शान्ता जोशी समेत पुगेकी थिइन् । त्यसैगरी राजवंशीलाई स्वागत गर्न मिल्स क्रिकेट क्लब एण्ड एकेडेमीका अध्यक्ष मुरली चौधरी, उपाध्यक्ष बिसाल बानियालगायत पनि पुगेका थिए । विराटनगर १४ जतुवा घर भएका राजवंशीलाई बुधबार महानगरपालिका भित्र बाजा गाजा सहित अभिनन्दन र्‍याली निकाल्ने तयारी समेत गरिएको पुर्वमन्त्री यादवले बताएका छन् ।
हालै सम्पन्न भएको प्रतियोगितामा जनकपुर बोल्टसबाट खेलेका ललितले कूल १० खेलमा कूल ४० ओभर बलिङ गरे। अर्थात उनले आफ्नो पूरै ओभर बलिङ गर्दै १७ विकेट हात पारेका थिए । त्यसक्रममा ५ ओभर मेडन राखेका उनले २१३ रन खर्चिएका थिए ।