विराटनगर । अपराध अनुसन्धानमा अब्बल प्रहरी अधिकारीको रुपमा कहलिएका प्रहरी निरीक्षक प्रकाश थापालाई सर्वोत्कृष्ट प्रहरी घोषित भएका छन् ।

कोशी प्रदेश प्रहरी कार्यालय विराटनगरले इलाका प्रहरी कार्यालय रानी मोरङमा कार्यरत प्रहरी निरीक्षक थापालाई २०८१ साल साउन महिनाको सर्वोत्कृष्ट प्रहरी आइतबार घोषित गरेको हो ।

सर्वोत्कृष्ट घोषित भएका थापा इप्रका रानीमा आएपछि सफल अनुसन्धान गर्दै जघन्य अपराधमा संलग्न अभियुक्त समात्न सफल रहेका छन् । उनले विभागीय मूल्य–मान्यता, आदेश–निर्देशनको पालना गरी उच्च मनोबल र साहसका साथ आफ्नो कर्तव्य निर्वाह गर्ने क्रममा फरार कैदीलाई पक्राउ गर्न सफल भएका छन् । प्रहरी निरीक्षक थापाले मोरङ जिल्ला कारागारमा रहेका कैदी बिरामी भएर कोशी अस्पताल विराटनगरमा उपचाररत रहेको अवस्थामा साउन १७ गते शौचालय जाने क्रममा भागेर फरार रहेको घट्नामा अहोरात्र खटि सूक्ष्म रुपमा सूचना सङ्कलन एवं खोजतलास गरी साउन २४ गते कैदीलाई मोरङको जहदा गाउँपालिका –१ तारेगामा स्थित नेपाल भारत सीमा नाका नजिकबाट फेला पारी नियन्त्रणमा लिन सफल भए ।

त्यसैगरी लागू औषध ओसार पसारमा संलग्न २८ जना मानिस पक्राउ गर्न प्रहरी निरीक्षक थापा सफल भएका छन् । अवैध रुपमा भन्सार छलेर भारतबाट नेपालतर्फ ल्याउदै गरेको १४ लाख ९ हजार ९ सय २० रुपैया बराबरको समान बरामद गरेका छन् । उनले अवैध रुपमा भारतबाट हुने चोरी तस्करी रोकथाम र नियन्त्रण गर्न पनि ठूलो भूमिका खेल्नुको साथै इप्रका रानी मातहतको क्षेत्रमा भएको जघन्य अपराधको घटनाको पनि सफल अनुसन्धान गरी दोषीलाई कानुनी कारवाहीको दायारमा ल्याउन सफल भएका छन् । त्यसैगरी विभिन्न मितिमा दुर्व्यसनी विरुद्ध आमाहरु कार्यक्रम अन्तर्गत विराटनगर महानगरपालिका–१६ स्थित क्यान सामुदायिक भवनमा अन्दाजी ६५० जना लागूऔषध प्रयोगकर्ताहरुलाई लागूऔषध दुरुपयोग न्यूनीकरण सम्बन्धी प्रशिक्षण प्रदान गरी उत्कृष्ट कार्य सम्पादन गरेको कोशी प्रदेश प्रहरी कार्यालयले जनाएको छ ।
प्रहरी कर्मचारीहरुको मनोवल उच्च राख्न कोशी प्रदेश प्रहरी कार्यालय बिराटनगरले हरेक महिना प्रदेश भरीबाट उत्कृष्ट प्रहरी कर्मचारीको छनौट गरी पुरस्कृत गर्दै आईरहेको छ ।