विराटनगर । गुराँस पुस्तकालय विराटनगरको ५४ औं स्थापना दिवसका अवसरमा पुस्तकालयद्वारा प्रकाशित बरगाछी स्मारिकाको लोकार्पण गरिएको छ ।

नेपाली कांग्रेसका नेता डा शेखर कोइरालाले मंगलबार बरगाछीको १७ औं अंक विमोचन गरेका हुन् । बरगाछी स्मारिका समालोचक दधिराज सुवेदीले सम्पादन गरेका हुन् ।

सो कार्यक्रममा स्वर्गीय मुत्तिप्रसाद–यदुनाथ चापागाई स्मृति सम्मानबाट समाजसेवातर्फ बरिष्ठ समाजसेवी दिनबन्धु गोयल सम्मानित भएका छन् । गोयललाई कार्यक्रमको प्रमुख अतिथि काँग्रेसका नेता कोइरालले कदर पत्र र दोसल्ला ओढाएर सम्मान गरे । यसैगरी राजनीतितर्फ पीताम्बर दाहाललाई सम्मान गरिएको छ ।

गुराँस पुस्तकालयका पूर्व सभापति रहेका नेपाली कांग्रेस विराटनगर महानगर समितिका सभापति दीपक चापागाईंले आफ्ना हजुरबुबा मुक्तिनाथ र बुबा यदुनाथ चापागाईंको स्मृतिमा सो सम्मान स्थापना गरेका हुन् ।

मुक्तिनाथ चापागाईं नेपाली कांग्रेस मोरङका भूतपूर्व सभापति हुन् । यस्तै लाइफगार्ड अस्पतालका सञ्चालक डा. कैलाश श्रेष्ठले स्थापना गरेको पूर्णकुमारी श्रेष्ठ छात्रवृत्ति कोषबाट गरिब तथा जेहेन्दार विद्यार्थीलाई छात्रवृत्ति पनि प्रदान गरिएको छ ।