विराटनगर । १२ औं संस्करणको हिसान स्पोर्ट्स मिट बुधबारदेखि सुरु हुने भएको छ । उच्च शिक्षालय तथा माध्यमिक विद्यालय संघ, नेपाल मोरङ (हिसान) ले विराटनगरको आयोजनामा उक्त प्रतियोगिता हुन लागेको हो ।
हिसानले मंगलबार विराटनगरमा पत्रकार सम्मेलन गरि माघ १० देखि माघ १६ गतेसम्म खेलकुद प्रतियोगिता हुने जानकारी गराएकोछ ।
खेलकुदको माध्यमबाट अनुशासन कायम राख्दै, स्वास्थ र सार्वभौमिकताको रक्षा गर्न सक्ने देशभक्त नागरिक उत्पादन, लागुपदार्थको कुलतबाट युवाहरुलाई जोगाउँदै राष्ट्रिय स्तरका खेलाडी तयार गर्न उद्देश्यले प्रतियोगिता गर्न लागेको हिसान मोरङका अध्यक्ष अमित ढकालले जानकारी दिए ।

हिसानले २०६५ सालदेखि निरन्तर रुपमा खेलकुदका कार्यक्रम आयोजना गर्दै आएको उनले बताए । गुणस्तरीय शिक्षासँगै अतिरिक्त क्रियाकलाप पनि विद्यार्थीहरुलाई सहभागि गराउन प्रतियोगिता आयोजना गरिएको उनले बताए ।
प्रतियोगितामा हिसान स्पोट्र्स मिटमा हिसानसँग आवद्ध कलेजहरुले मात्रै भाग लिनेछन् । स्पोट्र्स मिटमा फुटबल, कवडी, क्रिकेट, बास्केटबल, भलिबल, टेबलटेनिस सिंगल, एथलेक्टिसलगायतका खेलहरु रहेको छ । प्रतियोगितामा २९ वटा कलेजहरुका १ हजार २ सय बढी विद्यार्थीहरुले सभागिता रहने हिसानले जनाएको छ ।