विराटनगर । विराटनगरका फुलकुमार लालवानीले महामूर्खको उपाधि पाएका छन् ।
काँग्रेसका नेता लालवानीलाई मारवाडी यूवा मञ्च विराटनगरले सम्मान स्वरुप महामूर्खको उपाधि प्रदान गरेको हो ।

मारवाडी यूवा मञ्चले होलीको अवसर पारेर प्रत्येक वर्ष महामूर्खको उपाधि प्रदान गर्दै आएको छ । यस वर्षको महामूर्खको उपाधि लालवनीले पाएको मारवाडी युवा मञ्चका अध्यक्ष जय शर्माले बताए । मञ्चले प्रत्येक बर्ष होली पर्वको अवसरमा आयोजना गर्ने गरेको कार्यक्रममा मारवाडी समाजका एक जान विशिष्ट व्यक्तिलाई सम्मान स्वरुप महामूर्खको उपाधि प्रदान गर्ने प्रचलन रहेको छ ।

अघिल्लो बर्षका महामूर्ख उद्योगी महेश जाजुले शनिबार आगामी १ बर्षका महामूर्ख लालवानीलाई महामूर्खको पदबी हस्तान्तरण गरेको हो ।

मारवाडी यूवा मञ्च विराटनगरका अध्यक्ष जय शर्मा, निवर्तमान अध्यक्ष गोपाल अग्रवाल, पूर्वअध्यक्ष शिवरतन जोशी, राजेश लखोटिया, सेयरसिंङ दुगड, उपाध्यक्ष तथा कार्यक्रम संयोजक पवनपंकज पारख, उपाध्यक्ष मोहित लालवानी, महासचिव मोहित अग्रवालसहित मञ्चका पदाधिकारीहरुले महामूर्खको उपाधि पाएका लालवानीलाई बधाई तथा शुभकामना दिए ।

कार्यक्रममा कोशी प्रदेश सरकारका मन्त्री भक्तिप्रसाद सिटौला, मोरङका प्रमुख जिल्ला अधिकारी तिर्थराज भट्टराई, मोरङ व्यापार संघका अध्यक्ष नविन रिजाल, नेपाल उद्योग परिसंघ कोशी प्रदेशका अध्यक्ष भीम घिमिरे लगायतका सहभागिता रहेको थियो ।