विराटनगर, २३ माघ । मोरङको रंगेलीमा सन्थाल समुदायका महिलाहरु स्वरोजगार बन्ने भएका छन् । तराईको आदीवासी विपन्न सन्थाल समुदायका महिलाहरुलाई रंगेली नगरपालिकाले स्वरोजगार बनाउने भएको हो ।

उनीहरुलाई स्वरोजगार बनाउन रंगेली नगरपालिका, उद्यम विकास उपशाखाले ४५ दिने एड्भान्स सिलाई/कटाई तालिम प्रदान गरेको छ । गत पुस ४ गतेदेखि सुरु भएको एड्भान्स सिलाई/कटाई तालिम मंगलबार सम्पन्न भएको छ ।

तालिममा रंगेली–३ र ९ नम्बर वडाका २४ जना सन्थाल समुदायका महिलाहरुको सहभागीता रहेको थियो । यसअघि उनीहरुलाईनै पहिलो चरणमा आधारभूत सिलाई/कटाई तालिम दिइएको थियो ।

सो तालिममा शिप सिक्ने महिलाहरुलाई आवश्यक सिलाई मेसिन समेत नगरपालिकाले वितरण गरिएको थियो । अहिले पुनः तिनै महिलाहरुलाई थप शिप सिकाउन एड्भान्स तालिम दिइएको रंगेली नगरपालिकाकी उपमेयर भूमा पराजुलीले जानकारी दिइन् ।

तालिमको समापन कार्यक्रममा उपमेयर पराजुली र रंगेली नगरपालिकाका प्रमुख प्रशासकिय अधिकृत ओमकार प्रसाद न्यौपाने, प्रशिक्षक विमला श्रेष्ठ र निर्मला साहीले प्रमाणपत्र वितरण गरे ।

सो अबसरमा बोल्दै उपमेयर पराजुलीले रंगेलीमा विपन्न परिवारका महिलाहरुलाई आर्थिक रुपमा सवल बनाउन नगरपालिकाले शिप र रोजगारमुलक तालिम आयोजना गरिएको बताइन् । उनले शिप सिकेर सदुपयोग गर्दै व्यवसाय सञ्चालन गर्नका लागि नगरपालिकाले सिलाई मेसिन समेत वितरण गरेको बताइन् ।

कार्यक्रममा रंगेली नगरपालिकाका प्रमुख प्रशासकिय अधिकृत न्यौपानेले नगरपालिकाले गरेको लगानी खेर नजाने विश्वास व्यक्त गरे । उनले सिकेको शिप अनुसार व्यवसाय सञ्चालन गरि स्वरोजगार बन्न तालिमका सहभागीलाई शुभकामना दिए ।

कार्यक्रममा सहभागीहरुको तर्फबाट बोल्ने महिलाहरुले अब आफुहरु शिपको सदुपयोग गर्दै आय आर्जनमा लाग्ने बताए । उनीहरुले अब चाँडै व्यवसायीक रुपमा काम गर्ने प्रतिवद्धता जनाए ।

सो तालिमका सहभागी भएर सिलाई/कटाई शिप सिकेका महिलाहरुले समुह बनाएर व्यवसाय सञ्चालन गर्ने तयारी समेत गरेका छन् ।