विराटनगर । प्रदेश १ को सबैभन्दा ठूलो सरकारी अस्पताल कोशीमा बिग्रिएको दुई महिनापछि ‘सिटीस्क्यान’ मेसिन बनाएर संचालनमा ल्याएको छ ।

साढे आठ लाख इमेजेज निकालिसकेको कोशीको यो सिटीस्क्यानको ट्युब बिग्रिएपछि ४ कार्तिकदेखि थन्किएको थियो । ट्युब परिवर्तन गर्न १ करोड खर्च लाग्ने थियो । नारयण क्षेत्रीय अस्पताल विरगन्जमा सिटीस्क्यान बिग्रीएर थन्किएको थियो । उक्त सिटीक्स्यानको ट्युव राम्रो रहेको प्राविधिक जाँच गरेर थाहा भएपछि कोशी अस्पतलाका मेसु डा. लक्ष्मीनारयण यादवको पहलमा स्वास्थ्य मन्त्रालयसँग समन्वय गरेर उक्त ट्युव ल्याएर जडान गरेपछि सोमबारदेखि पूर्ण रूपमा संचालनमा आएको हो ।
फिलिपस कम्पनीको सिटीस्क्यानमा ट्युव जडान गरेपछि पूर्ण रुपमा संचालनमा आएको प्राविधिक इन्जिनियर शेखर रन्जितले जानकारी दिए । ‘काशीमा रहेको सिटीस्क्यानमा ट्युव जडान गरेर हामीले आइतबार प्राविधीक जाँच पनि गरियो । राम्रोसँग चलेको छ,’ उनले भने, ‘सोमबार ७ जनाको सिटीस्क्यान गरिएको छ ।’

कोशीमा दैनिक २५ जनासम्मको सिटीस्क्यान हुने गरेको छ । ६ जना रेडियोलोजिष्ट डाक्टर र ४ जना टेक्निसियन रहेका छन् । दैनिक २ सय देखि २ सय ५० जनाको भिडियो ए–क्सरे र २ सय भन्दा बढी ए–क्सरे हुने गरेको छ ।

यसअघि दुई महिनासम्म ‘सिटीस्क्यान’ बिग्रिदा कोशीमा आउने बिरामीले महंगो शुल्क तिरेर निजी अस्पताल जान बाध्य थिए ।
कोशीमा अस्पतालमा दैनिक आउने १ हजार देखि १ हजार ५ सय बिरामीमध्ये ४० प्रतिशतलाई अल्ट्रासाउण्ड र ८÷१० प्रतिशतलाई सिटीस्क्यान, एमआरआइ र एक्सरेको आवश्यकता पर्ने गरेको छ ।