विराटनगर । मोरङमा सोमबारबाट मात्र मतगणना हुने भएको छ । निर्वाचन आयोगले रातिबाटै मतगणना सुरु गर्न निर्देशन दिएको भएपनि मुख्य निर्वाचन अधिकृतको कार्यालयले सोमबार विहानबाट मात्र गणना सुरु गर्ने तयारी गरेको हो ।

मोरङको उत्तरी क्षेत्र भौगौलिक रुपमा यातायात सहज रुपमा आवतजावत नहुने भएकोले अन्यन्त्र जिल्ला हुँदै ल्याउनुपर्ने अवस्था रहेको कारण तत्काल गणना सुरु हुने अवस्था नरहेको जिल्ला निर्वाचन अधिकृतको कार्यालयका सूचना अधिकारी हेमराज बुढाथोकीले जानकारी दिए । सबै निर्वाचन क्षेत्रको मतपेटिका संकलन भइसकेपछि एकसाथ गणना सुरु गर्ने उनले जानकारी दिए ।

‘शनिबार रातिसम्म मतपेटिका गणनास्थलसम्म ल्याउन समय लाग्छ । त्यहि भएर आइतबार रातिबाट गणना हुने सम्भावना न्यून छ’ उनले भने, ‘सर्बदलीय बैठक राखेपछि मतगणनाको समय टुंगो लाग्छ ।’ मोरङका ६ वटा निर्वाचन क्षेत्रको चार ठाउँमा मतगणना हुने निर्वाचन कार्यालयले जनाएको छ ।

निर्वाचन क्षेत्र नं. ४, ५ र ६ को विराटनगरस्थित आदर्श माविमा गणना हुने मुख्य निर्वाचन अधिकृत दुर्गाप्रसाद ढुङ्गेलले जानकारी दिए । मोरङ क्षेत्र नं. १ को उर्लाबारी नगरपालिका, क्षेत्र नं. २ को रतुवामाई नगरपालिकामा रहेको विश्वनाथ मन्दिर र क्षेत्र नं. ३ को बेलबारी नगरपालिका ३ मा रहेको भगवती माविमा गणना हुने उनले बताए ।

प्रत्येक निर्वाचन क्षेत्रमा प्रारम्भिक चरणमा तीन वटा कोठाबाट मतगणना स्थल बनाइएको छ । ‘अहिले प्रत्येक निर्वाचन क्षेत्रमा तीन वटा गणना स्थल बनाइएको छ,’ उनले भने, ‘आवश्यकता अनुसार पछि थप हुनेछ ।’ एउटा मतगणना स्थलमा ६ जना गणकको टोली रहनेछ ।
मतगणना सुरु भएको तीन दिनभित्र प्रत्यक्ष तर्फको मत परिणाम सार्वजनिक गरिसक्ने तयारी गरिएको निर्वाचन अधिकृतको कार्यालयले जनाएको छ । ढिलोमा ८ गतेभित्रमा प्रत्यक्षतर्फको मतपरिणाम सार्वजनिक गरिसक्ने कार्यालयको दावी छ ।

मतगणना स्थलमा बाँसको बार लगाएर सिसिटिभी जडान गरिएको छ । मोरङ क्षेत्र नं. ४ को गणनास्थल आदर्श माविको भुईतलामा रहेको छ । क्षेत्र नम्बर ५ को गणना स्थल आदर्श स्कूलको इन्जिनियरिङ भवनमा रहेको छ भने ६ नम्बर निर्वाचन क्षेत्रको आदर्श स्कुलको दोस्रो तला तोकिएको छ ।