पछिल्ला दिनमा बिग्रिँदै गएको चीन र अमेरिकाको सम्बन्ध सुधारका लागि आज दुवै देशका राष्ट्रपतिबीच वार्ता हुँदैछ । अमेरिकी राष्ट्रपति जो बाइडेन र चिनियाँ राष्ट्रपति सी चीनफिङबीच वार्ता हुन लागेको हो ।

चार महिनापछि दुवै देशका राष्ट्रपतिबीच कुराकानी हुन लागेको अमेरिकी अधिकारीहरूले बताएका छन् । राजनीतिक र व्यापारिक द्वन्द्वमा अल्झिएका चीन-अमेरिका सम्बन्धलाई सभामुख न्यान्सी पेलोसीको सम्भावित ताइवान भ्रमणले अझ जटिल बनाएका बेला यो वार्ता हुन लागेको हो ।

बाइडेन र सीबीचको वार्तामा उत्तर कोरियाको आणविक कार्य, युक्रेनमा रुसको आक्रमणका विषयमा बेइजिङ र वासिङटनबीचको मतभेद, इरान आणविक सम्झौतालाई पुनर्जीवन दिने प्रयास र ट्रम्प प्रशासनले चीनमा लगाएको कठोर करको अमेरिकी प्रशासनको समीक्षाको स्थितिलगायतका विषयमा छलफल हुने बताइएको छ ।

ह्वाइट हाउसका राष्ट्रिय सुरक्षा प्रवक्ता जोन किर्बीका अनुसार चीन अमेरिकाबीच यस्ता विषयहरू छन् जहाँ आपसी सहयोग सम्भव छ भन्ने विश्वास गरिन्छ ।