विराटनगर, २० असार । समयमा चिकित्सक नभेटिएपछि कोशी अस्पतालले कारबाहीकाे लागि पत्र काटेको छ। अस्पतालमा निर्धारित समयमा समेत बिरामीलाई छाडेर चिकित्सक अन्यत्र निजी क्लिनिकमा उपचारमा व्यस्त हुने गरेको गुनासोसँगै अस्पतालका निमित्त मेडिकल सुप्रिटेन्डेन्ट डा. यज्ञराज खरेलले प्रशासन कार्यालय गुहारेका छन्।

सरकारी अस्पतालमा उपचार सेवा प्रभावकारी बनाउनका लागि पछिल्लो समय क्रियाशील रूपमा देखिएका डा. खरेलले जिल्ला प्रशासन कार्यालय मोरङलाई आइतबार पत्र बुझाउँदै कारबाहीकाे माग गरेका हुन्।

उनले कोशी अस्पतालको नाम बोर्डमा अनधिकृत रूपमा राखेर अस्पतालबाहिर निजी क्लिनिक सञ्चालनदेखि उपचारमा खटिने चिकित्सक तथा स्वास्थ्यकर्मीलाई कारबाही गर्न माग गरेका हुन्।

उनले यस विषयको बोधार्थ जिल्ला प्रहरी कार्यालय मोरङलाई समेत गरेका छन्। सर्वसाधारणको उपचारमा अत्यधिक भीडभाड हुने अस्पतालमा चिकित्सक तथा स्वास्थ्यकर्मी सेवासमयमा समेत बाहिर भेटिन थालेपछि जनगुनासो बढ्दै गएको हो।