एजेन्सी, २२ कात्तिक । यस वर्षको जाडो याममा चीनका कतिपय क्षेत्रमा विद्युत आपूर्तिमा समस्या आउने भएको छ । जाडो अध्यधिक हुँदा बिजुलीको खपत बढ्ने तर आपूर्ति कायम राख्न समस्या पर्न सक्ने चीनले बताएको हो ।

कैयौँ क्षेत्रमा बिजुली कटौती हुन सक्ने जनाइएको छ । यद्यपि सरकारले कोइलाको निर्यात बढाउने घोषणापछि हालतमा केही सुधार आएको छ । तर एक अर्ब भन्दा धेरै मानिसमा विद्युत वितरण गर्ने सरकारी ग्रिड कम्पनीले अहिले पनि आवश्यक र प्राप्त कोइलामा अन्तर रहेको बताएको छ ।

चीनका अधिकांश क्षेत्रमा यो वर्ष जाडो निकै बढ्ने प्रक्षेपण गरिएको छ । त्यहाँका कतिपय स्थानमा तीन हप्ताअघिदेखि नै हिमपात सुरु भइसकेको छ । चीनको राष्ट्रिय मौसम विज्ञान केन्द्रले उत्तरी क्षेत्रमा भारी हिमपात हुन सक्ने चेतावनी जारी गरेको छ ।

सोमबार बिहानसम्म हिउँ र आँधीले भित्री मङ्गोलिया, हेबेई, तियानजिन, शानडोङ, लिओनिङ, जिलिन र हेइलोङजियाङका केही भागहरूमा असर गर्ने सम्भावना रहेको उक्त केन्द्रले जनाएको छ । यी मध्ये केही क्षेत्रहरूमा ४० सेन्टिमिटरभन्दा बढी हिउँ जम्ने अनुमान गरिएको छ ।

केन्द्रले स्थानीयहरूलाई घर भित्रै बस्न सल्लाह दिँदै सरकारी अधिकारीहरूलाई सडक, रेलवे, बिजुली र दूरसञ्चारमा सावधानी अपनाउन आग्रह गरेको छ ।