विराटनगर, १२ असोज । मोरङको कटहरीमा एक शिक्षक विद्यालयमा बालबालिकालाई पढाउन छाडेर सत्तारुढ दल कांग्रेसको महाधिवेशनमा व्यस्त भएको पाइएको छ ।

कटहरी–४ खरबनास्थित श्री आधारभूत विद्यालयका शिक्षक निरज साह विद्यालय समयमा विद्यार्थीलाई पढाउन छाडेर कांग्रेसको महाधिवेशनमा व्यस्त रहेको पाइएको छ । शिक्षक साह सो विद्यालयमा कारारका शिक्षक हुँन् ।

स्रोतका अनुसार नेपाली कांग्रेसको कार्यकर्ता रहेका कारण पहुँचकै आधारमा उनि करार शिक्षकमा नियुक्त भएका थिए । तर, कांग्रेस कृयाशिल सदस्य भएकाले उनी विद्यालय समयमा विद्यार्थीलाई पढाउन छाडेर सो पार्टीको राजनीतिक गतिविधिमा संलग्न हुँदै आएको स्थानीयले बताएका छन् । ‘पढाउन छाडेर अधिकांस समय कांग्रेस पार्टीकै काममा उहाँ बढी हिँड्नुहुन्छ ।’ एक स्थानीयले भने,‘हामीले भन्दा गाउँपालिका अध्यक्ष हाम्रै पार्टीको हुनुहुन्छ, केन्द्र सरकार हाम्रै छ । मलाई कसले के गर्न सक्छ भन्दै हामीलाई उल्टै धम्क्याउनुहुन्छ ।’

शिक्षक साह जनताको करबाट तलब भत्ता लिएपनि विद्यार्थीलाई पढाउन छाडेर पार्टीको काममा व्यस्त हुँदा बालबालिकाको अध्ययनमा असर परेको भन्दै स्थानीय आक्रोशित बनेका छन् । ‘धेरै जसो समय उहाँले पार्टीको काममा हिँडेर बालबालिको भविष्यमाथि खेलवाड गर्दै हुनुहुन्छ । राजनीति गर्ने भए कि त जागिर छाड्नु पर्यो, होइन भने विद्यालय समय बाहेक गर्नुपर्यो ।’ अर्का एक स्थानीयले भने,‘पढाउने समयमा त विद्यार्थीलाई पढाउनु पर्यो नी । होइन भने शिक्षकको के काम ? तलब मात्र खाने ?’

विद्यालय व्यवस्थापन समितिका अध्यक्ष दिपेन्द्र ऋषिदेवले पनि शिक्षक साह विद्यार्थीलाई पढाउन भन्दा बढी पार्टीको काममै हिँड्ने गरेको बताए ।

उनले अब विद्यालय समयमा विद्यलयमा अनुपस्थित हुने शिक्षकलाई कडाई गरिने समेत बताए । शिक्षक साह केहीदिन विद्यालयमा पढाउन छाडेर अघि सम्पन्न कांग्रेसको वडा अधिवेशनमा व्यस्त थिए । उनी कांग्रेसको क्षेत्रीय प्रतिनिधिको उम्मेदवार पनि बनेका थिए । तर, साह निर्वाचनमा पराजित भएको स्थानीयले बताए ।

पढाउन छाडेर राजनीतिमा मात्र लाग्न थालेपछि उनीबाट असन्तुष्ट नेपाली कांग्रेसकै स्थानीय कृयाशिल सदस्यहरुले उनलाई चुनाब हराएको स्थानीयको भनाई छ ।

सो विद्यालयमा अधिकांश दलित समुदायका बालबालिका अध्ययनरत छन् । ८ कक्षा सम्म पढनपाठ हुने सो विद्यालयमा ५ सय २१ विद्यार्थी अध्ययनरत रहेको व्यवस्थापन समितिका अध्यक्ष ऋषिदेवले जानकारी दिए ।