विराटनगर, ३० वैशाख । कोरोना भाइरसको संक्रमणका कारण बिहीबार बिहान मोरङमा थप छ जनाको मृत्यु भएको छ । विराटनगरस्थित नोबेल शिक्षण अस्पतालमा तीन, कोसी अस्पताल कोभिड–१९ उपचार केन्द्रमा दुई र मोरङको बुढीगंगास्थित विराट शिक्षण अस्पतालमा एक जनाको मृत्यु भएको हो ।

नोबेल शिक्षण अस्पतालमा सुनसरीको इनरुवा नगरपालिकाकी १८ वर्षीया किशोरी, मोरङको उर्लाबारी नगरपालिका–२ का ४६ वर्षीय पुरुष र सप्तरीको कन्चनपुर–८ का ७० वर्षीय पुरुषको मृत्यु भएको अस्पतालका प्रवन्धक नारायण दाहालले जानकारी दिए ।

त्यस्तै विराटनगरस्थित कोसी अस्पताल कोभिड–१९ उपचार केन्द्रमा विराटनगर–४ का ६० वर्षीय पुरुष र ललितपुर महानगरपालिका घर भएका ५८ वर्षीय पुरुषको मृत्यु भएको सूचना अधिकारी अनुपम राजवंशीले जानकारी दिए ।

त्यस्तै बुढीगंगा गाउँपालिकास्थित विराट शिक्षण अस्पतालमा विराटनगर–१ का ३० वर्षीय युवाको मृत्यु भएको हो । २५ वैशाखमा अस्पताल भर्ना गरिएका उनको उपचारका क्रममा विहिबार विहान मृत्यु भएको कोभिड इन्चार्ज सुनिल देवले जानकारी दिए ।