नेपाली कांग्रेसको १४ औं महाधिवेशन आगामी भदौ दोस्रो साता हुने भएको छ । पार्टी कार्यालय सानेपामा बिहीबार बसेको केन्द्रीय समितिको बैठकले पार्टीको १४ औं महाधिवेशन ७–१० भदौमा काठमाडौंमा गर्ने निर्णय गरेको केन्द्रीय सदस्य गुरुराज घिमिरेले जानकारी दिए ।

महामन्त्री पूर्णबहादुर खड्काले बुधबारको बैठकमा कांग्रेसको १४ औँ महाधिवेशन ७–१० भदौमा काठमाडौंमा गर्ने गरी प्रस्ताव पेस गरेका थिए । महामन्त्री खड्काको महाधिवेशनको कार्यतालिका परिमार्जनसहित पेस गरेको प्रस्ताव बिहीबारको बैठकले सर्वसम्मतीले पारित गरेको केन्द्रीय सदस्य घिमिरेले जानकारी दिए ।

उनका अनुसार वडा, क्षेत्र, नगर र जिल्ला तथा क्रियाशील सदस्यता वितरण र नविकरणको तालिका पनि परिमार्जन गरिएको छ ।

कोरोना महामारीका कारण पार्टीको सदस्यता नविकरण, नयाँ सदस्यता वितरणदेखि विजयकुमार गच्छदार नेतृत्वको तत्कालीन फोरम लोकतान्त्रिकसँगको पार्टी एकतापछि गर्नु पर्ने पार्टी समायोजनको काम नसकिएको भन्दै महाधिवेशन भदौ दोस्रो हप्ताका लागि सारिएको हो ।

भदौमा महाधिवेशन गर्न कांग्रेसलाई अब संविधानको साहरा लिनुपर्नेछ । पाँच–पाँच वर्षमा दलको महाधिवेशन गर्नु पर्ने संवैधानिक व्यवस्था छ । संविधानको धारा २ सय ६९ को उपधारा ४ को खण्ड ‘ख’ले पाँच वर्षभित्र दलले आफ्नो निर्वाचन गर्न नसकेमा ६ महिना थप्न सक्ने प्रावधान छ । त्यही प्रावधानलाई टेकेर अब कांग्रेसले निर्वाचन आयोगलाई पत्र लेख्नुपर्नेछ ।

कांग्रेसको १३ औं महाधिवेशन भएको १९ फागुनमा पाँच वर्ष पुग्दैछ । कांग्रेसको विधान अनुसार अघिल्लो १९ फागुनसम्ममा कांग्रेसको १४ औं महाधिवेशन भइसक्नु पर्ने थियो ।

तर, विधानलाई टेकेर सभापति शेरबहादुर देउवाले केन्द्रीय समितिको म्याद ११ पुस २०७६ मा एक वर्षका लागि गरेका थिए । विधान अनुसार थपिएको एक वर्षको कार्यकाल पनि १९ फागुनबाट सकिँदै थियो ।