विराटनगर, २४ माघ । राजवंशी चलचित्रकर्मी समाद समितिले समाद–२ नामक गिती भिडियो एल्बम लोकार्पण गरेको छ । विराटनगरमा शनिबार आयोजित कार्यक्रमकाबीच विराटनगर महानगरपालिकाका मेयर भीम पराजुलीले समाद २ को लोकार्पण गरे ।

समाद समितिले निर्माण गरेको गिती भिडियो बहुभाषि छ । भिडियोमा विभिन्न ४ वटा भाषाका गीतहरु समावेश गरिएको छ । १२ वटा भिडियो गित समेटिएको एल्बममा नेपाली, हिन्दी, मैथिली र राजवंशी भाषाका गितसंगित प्रस्तुत गरिएको छ ।

एल्बममा ‘हामी नेपाली’ बोलको नेपाली गीत समेटिएको छ भने ‘वाह रे मोदी’ हिन्दीमा‘’ ‘सुन सखी हमर’ राजवंशी भाषामा र ‘दिलके पसिन’बोलमा मैथिली गीत समेटिएको एल्बम निर्माता समाद समितिका अध्यक्ष दीपनारायण राजवंशीले जानकारी दिए ।

एल्बम निर्माणका लागि विराटनगर महानगरपालिकाले २ लाख रकम सहयोग गरेको छ भने थप ६ लाख खर्चगरि ८ लाख खर्चमा भिडियो एल्बम निर्माण गरिएको निर्माण समितिले जनाएको छ ।

गिती भिडियोको चन्दन राजवंशीले निर्देशन गरेका छन भने शब्द, संगीत र स्वर दीप नारायण राजवंशीको रहेको छ । यसैगरि एल्बममा बलबहादुर राजवंशी, अनुमा चौधरी, माला राजवंशी र सुशिला राजवंशीले समेत स्वर दिएका छन् । विमोचनको अवसरमा एल्बम निर्माणको क्रममा विभिन्न क्षेत्रबाट योगदान दिने ब्यक्तिहरुलाई सम्मान गरिएको थियो ।