विराटनगर, ५ पुस-विराटनगर–१० मा आइतबारदेखि एचडियुु र अक्सिजनसहितको एकसय वेडको कोभिड अस्पताल सञ्चालनमा आएको छ ।

प्रदेश सरकार, विराटनगर महानगरपालिका र निजी क्षेत्रको सहयोगमा करिब आठ करोड रुपैयाँको लागतमा अस्पताल संचालनमा आएको हो । अस्पताल निर्माणका लागि प्रदेश सरकारले १ करोड, महानगरपालिकाले २५ लाख र निजी क्षेत्र तथा बैंकलगायत विभिन्न संघसंस्थाले ६ करोड ७५ लाख सहयोग गरेका थिए ।

अस्पतालको उद्घाटन गर्दै प्रदेश नम्बर १ का मुख्यमन्त्री शेरधन राईले नागरिकको स्वास्थ्य सुरक्षाको जिम्मा प्रदेश सरकारको रहेको बताए । उनले कोरोनाको उपचारको काममा नीजि अस्पतालले नागरिकको घरबाससमेत उठाएकोले गुणस्तरीय निःशुल्क उपचारका लागि अस्पतालको निर्माण गरिएको बताए ।

संघीय सरकारका उद्योग, वाणिज्य तथा आपूर्ति राज्यमन्त्री मोतीलाल दुगडले निजी क्षेत्रको सहकार्यमा निर्माण गरिएको अस्पताल अत्यन्तै प्रशंसनीय कार्य भएको चर्चा गर्दै यसको व्यवस्थापन चुस्त र दुरुस्त हुुनुुपर्नेमा जोड दिए ।

प्रदेश नं १ का प्रदेश सभामुख प्रदीपकुमार भण्डारीले अस्पताल निर्माण नीजि क्षेत्रको सहयोगमा अनुकरणीय कार्य भएको चर्चा गरे । सो अवसरमा सामाजिक विकासमन्त्री जीवन घिमिरेले कोभिड अस्पतालको क्षेत्रमा थप १ सय बेडको भेन्टिलेर अस्पतालमा चाँडै निर्माण कार्य सुरु गर्नका लागि स्विस सरकारबाट चार करोड सहयोग उपलव्ध भएको जानकारी दिदै फोहर व्यवस्था, वाटर ट्रिटमेन्ट, र अक्सिजन प्लान्टलगायत यस क्षेत्रमा निर्माण गर्ने बताए ।

विराटनगर महानगरपालिकाका मेयर भीम पराजुलीले संक्रमित नागरिकको उपचारको समस्याका कारण नीजि क्षेत्र एवं प्रदेश र स्थानीय सरकारको सोच अनुसार अस्पताल निर्माण भएको बताउँदै भविष्यमा सो अस्पताललाई विशिष्टकृतको मुटु रोग उपचार केन्द्र बनाउनुपर्नेमा जोड दिए ।

नागरिक केयर सेन्टरका अध्यक्ष पवन सारडा, सामाजिक विकास मन्त्रालयका सचिव गोविन्दवहादुर कार्कीले अस्पतालको निर्माणबाट यस प्रदेशका साथै छिमेकी प्रदेशका नागरिकले सहज उपचारको सुविधा प्राप्त गर्ने बताए ।