काठमाडौं, २० मंसिर-आज बस्न लागेको नेकपा सचिवालय बैठकमा पनि पार्टी अध्यक्ष तथा प्रधानमन्त्री केपी शर्मा ओली उपस्थित हुनेमा अन्यौल कायमै छ । अनौपचारिक संवादमार्फत सहमति जुटाउने प्रयास जारी रहे पनि आजको सचिवालय बैठकमा उपस्थित हुनेनहुनेबारेमा भने टुंगो नलागेको ओलीका प्रेस सल्लाहकार सूर्य थापाले जानकारी दिए । गत बुधबार पनि ओली सचिवालय बैठकमा उपस्थित भएका थिएनन् । उनी बैठकमा नआएपछि आजसम्मका लागि स्थगित गरिएको थियो ।

पार्टी वरिष्ठ नेता खनालले भने आज ओली अनुपस्थित भए पनि सचिवालय बैठक नरोकिने बताएका छन् । उनले आज बस्ने सचिवाल बैठकले स्थायी समितिको बैठकको एजेण्डासमेत तय गर्ने बताए ।

आज दिउँसो १ बजे प्रधानमन्त्री निवास बालुवाटारमा बस्ने सचिवालय बैठकमा दुवै अध्यक्षका राजनीतिक प्रदिवेदनमाथि छदफल हुने कार्यसूची छ । १३ मंसिरमा ओलीले ३८ पृष्ठ लामो प्रतिवेदन पेस गरेका थिए । उनले पेस गरेको लिखित प्रतिवेदनमा पार्टीका अर्का अध्यक्ष पुष्पकमल दाहाल (प्रचण्ड)ले आफूलाई लगाएको आरोपको खण्डन गरेका थिए । ओलीअघि २८ कात्तिकमा प्रचण्डले १९ पृष्ठको प्रतिवेदन सचिवालय बैठकमा पेस गरेका थिए । उनले आफ्नो प्रतिवेदनमा ओलीमाथि विभिन्न आरोप लगाएका थिए ।