काठमाडौं, १३ मंसिर-नेपाल नेपाल कम्युनिस्ट पार्टी (नेकपा)का सचिवालय सदस्य विष्णु पौडेलले अध्यक्ष केपी शर्मा  ओलीबाट सचिवालय बैठकमा पेस हुने प्रतिवेदन समस्या बल्झाउने किसिमको नहुने बताएका छन् । उनले पार्टीको अभिभावकको हैसियतमा अध्यक्ष ओलीले सम्हालिएको प्रतिवदेन पेस गर्ने बताए ।

‘सचिवालय बैठकमा आउने प्रतिवेदन राम्रै आउनेछ सबैका अभिभावक भएका हैसियतले समस्यालाई नबल्झाउने ध्येयसहित सम्हालिएको प्रतिवेदन प्रस्तुत होला,’ नेकपाका सचिवालय सदस्य पौडेलले भने ।

अध्यक्ष पुष्पकमल दाहाल (प्रचण्ड) ले लगाएका आराेपको भने ओलीले खण्डन गर्ने भएका छन् । ओलीले सरकार भ्रष्टाचारी र संघीयता विरोधी भएको आरोप आधारहीन भएको भन्दै त्यसलाई पुष्टि गर्न अर्का अध्यक्ष प्रचण्डलाई चुनौती दिने तयारी गरेका छन् ।

प्रतिवेदनमा सबै आराेपको जवाफभन्दा पनि राजनीतिक विषयमा बढी केन्द्रित रहेको प्रधानमन्त्रीका प्रेस सल्लाहकार सूर्य थापाले बताए । ‘आफूमाथि लागेका आधारहिन आरोपबारे उहाँले खण्डन त गर्नु नै हुनेछ अभिभावकको हैसियतले केही कुरा सम्झाउने प्रयत्न समेत उहाँबाट हुनेछ,’ थापाले भने ।

गत २८ कात्तिक को सचिवालय बैठकमा प्रचण्डले १९ पृष्ठ लामो राजनीतिक प्रतिवेदन पेस गरेका थिए । प्रधानमन्त्री पक्षधर नेताहरूले यसलाई आरोपपत्रको संज्ञा दिएका थिए । त्यसलाई नै काउन्टर दिनका लागि अध्यक्ष ओलीले शनिबार १ बजे तय भएको सचिवालय बैठकमा प्रतिवेदन पेस गर्ने भएका हुन् ।