कोरोना संक्रमणबाट काठमाडौं उपत्यकाका एक महिला र तीन पुरुष गरी चार जनाको मृत्यु भएको छ । कोरोना संक्रमणबाट काठमाडौंका एक महिला र दुई पुरुष, ललितपुरका एक पुरुषको निधन भएको हाे ।

त्यस्तै, सुनसरीका तीन, रूपन्देहीका एक पुरुष र चितवनकी एक महिलाको निधन भएको मन्त्रालयले पुष्टि गरेको छ । नेपालमा कोरोना संक्रमणबाट मृत्यु हुनेको संख्या ६ सय ४५ पुगेको छ । मृत्यु दर ०.५८ प्रतिशत रहेको मन्त्रालयको तथ्यांक छ ।

आज देशभर ३ सय ४६ जना जना संक्रमितको भेन्टिलेटर र आइसोलेसनमा उपचार भइरहेको छ । २ सय ७९ जना आईसीयूमा र ६७ जना संक्रमितको भेन्टिलेटरमा उपचार भइरहेको मन्त्रालयको तथ्यांक छ ।

मोरङ, सुनसरी, काठमाडौं, भक्तपुर, ललितपुर, चितवन, बाँके, रूपन्देही र सुर्खेत जिल्लामा पाँच सयभन्दा बढी संक्रमित रहेका छन् भने मनाङमा संक्रमण शून्यमा झरेको छ ।

आज देशभर १४ हजार ५ सय ३० जनाको परीक्षण गर्दा ४ हजार ४७ जनामा कोरोना संक्रमण पुष्टि भएको छ । आजसम्म ११ लाख ९१ हजार ५ सय १४ जनाको परीक्षण गर्दा १ लाख ११ हजार ८ सय दुई जनामा कोरोना पुष्टि भएको छ ।

संक्रमितमध्ये ३३ हजार ८ सय ८० सक्रिय छन् भने ७७ हजार २ सय ७७ जना संक्रमणमुक्त भएका छन् । पछिल्लो २४ घण्टाको अवधिमा देशभरबाट १ हजार ४ सय ७३ जना डिस्चार्ज भएका छन् ।