विराटनगर, २३ असोज–विराटनगरमा संस्थागत रुपमा निर्माण भएको कोभिड १९ आइसोलेसन सेन्टर सञ्चालनमा आएको छ । लायन्स क्लबले विराटनगर १२ मा निर्माण गरेको ३० शैयाको आइसोलेसन केन्द्र शुक्रबार प्रदेश १ का मुख्यमन्त्री शेरधन राईले उद्घाटन गरेका छन् ।

होटलमा पैसा तिरेर आइसोलेसनमा बस्न नसक्ने, घर वा डेरामा बस्दा समस्या हुने तथा निजी अस्पतालमा खर्च गरेर आइसोलेसन सेवा लिन नसक्ने संक्रमितहरुलाई सहयोग गर्ने उद्देश्यले लायन्सले प्रदेश सरकारसँग समन्वय गरेर सो आइसोलेसन केन्द्र निर्माण गरेको हो ।

आइसोलेसन उद्घाटन गर्दै मुख्यमन्त्री राईले दैनिक रुपमा संक्रमितको संख्या बढिरहेको बताउँदै अब अस्पतालहरुले पनि धान्न नसक्ने अवस्था आइसकेकाले सरकारले संस्थागत आइसोलेसन निर्माण गर्ने सोच अघि बढाएको बताए ।

उनले संस्थागत आइसोलेसनप्रति भने संस्थाहरुको चासो न्यून देखिएको गुनासो गरे । मुख्यमन्त्री राईले कोरोना भाइरस संक्रमण बढ्दै जाँदा अस्पतालहरुको क्षमता बढाउनु पर्ने, आइसोसेलन र आइसियुहरु थप्नु पर्ने अवस्थामा सरकारले एक हजार शैयाको संस्थागत आइसोलेसन निर्माण गर्न चाहेको बताए ।

कार्यक्रममा सामाजिक विकास मन्त्री जीवन घिमिरेले एक महिना अघि नै उद्घाटनको तयारी गरेको आइसोलेसन केन्द्र आफु स्वयं संक्रमित हुनपुग्दा केही ढिलो आरम्भ हुन गएको बताए । उनले सरकारले आइसोलेसनका लागि आवश्यक सबै सहयोग उपलव्ध गराउने प्रतिवद्धतासमेत जनाए ।