स्वास्थ्य तथा जनसंख्या मन्त्रालयका प्रवक्ता प्रा.डा. जागेश्वर गौतमले पछिल्लो २४ घण्टाको अवधिमा ४ महिला र १० पुरुष गरी १४ जनाको कोरोना संक्रमणबाट निधन भएको जानकारी दिए ।

उनका अनुसार कोरोना संक्रमणबाट मृत्यु हुनेमा ३ महिला काठमाडौंका छन् । काठमाडौंका ८२, ६७ र २२ वर्षीया महिलाको निधन भएको हो । त्यस्तै, चितवनको ३५ वर्षीया महिलाको पनि कोरोनाका कारण निधन भएको उनले बताए ।

त्यस्तै, कोरोना संक्रमणबाट सप्तरीका दुई ५५ वर्षीय पुरुष, धनुषा ६५, कास्कीका ३१, नवलपरासीका ३७, प्यूठानका ५८, रूपन्देहीका ७८, पाल्पाका ६३ र सुर्खेतका ४२ वर्षीय पुरुषको कोरोनाका कारण निधन भएको छ । योसँगै कोरोना संक्रमणबाट मृत्यु हुनेको संख्या २७१ पुगेको मन्त्रालयले जनाएको छ ।

पछिल्लो २४ घण्टामा १३ हजार ६ सय ३८ जनाको पीसीआर परीक्षण गर्दा उपत्यकामा थप ४५४ सहित देशभर एक हजार तीन सय ५९ जनामा कोरोना संक्रमण देखिएको प्रवक्ता डा. गौतमले जानकारी दिए । उनका अनुसार देशभरबाट आज एक हजार तीन सय ५४ जना संक्रमित निको भएर घर फर्किएका छन् ।