विराटनगर, साउन १५–विराटनगररनेपाल पत्रकार महासंघ मोरङ शाखाले यस वर्षको ‘खिलेश्वरी स्मृति पत्रकारिता पुरस्कार–२०७७’ पत्रकार कमल पौडेललाई प्रदान गर्ने निर्णय गरेको छ । मकालु टेलिभिजनका समाचार सम्पादक पौडेललाई १५ हजार राशिको उक्त पुरस्कार दिने निर्णय बिहीबार बसेको पुरस्कार छनौट समितिले गरेको हो ।

पीताम्वर खिलेश्वरी स्मृति प्रतिष्ठानको सहकार्यका स्थापित सो पुरस्कार यस वर्षदेखि नेपाल पत्रकार महासंघ मोरङ शाखाले प्रदान गर्न लागेको हो । पुरस्कारसम्बन्धमा गत वर्ष प्रतिष्ठान र महासंघबीच सम्झौता भई तीन लाखको अक्षयकोष राखिएको छ ।

कोषबाट प्राप्त ब्याजबाट पत्रकार कोशराज रेग्मी स्मृति पुरस्कार र खिलेश्वरी स्मृति पत्रकारिता पुरस्कार गरी दुई पुरस्कार दिने गरिएको छ । पत्रकार महासंघ मोरङका अध्यक्ष बन्धु पोखरेलको अध्यक्षतामा बसेको बैठकले यस वर्षको खिलेश्वरी स्मृति पत्रकारिता पुरस्कार पत्रकार पौडेल प्रदान गर्ने निर्णय गरेको हो ।

उक्त पुरस्कार तत्कालीन समयमा कोशराज रेग्मीले आफ्ना पितामाताको स्मृतिमा २०४२ सालदेखि प्रदान गर्दै आएका थिए । उनको निधनपश्चात परिवारले २०७५ पुस २ गते नेपाल पत्रकार महासंघ मोरङ शाखासँग सम्झौता गरी अक्षयकोश स्थापना गरेको थियो ।

पत्रकार पौडेललाई सो पुरस्कार यही भदौ ३ गते मोतीराम भट्ट जयन्तीका दिन विराटनगरमा प्रदान गरिने महासंघ मोरङका सचिव अर्जुनकुमार आचार्यले जानकारी दिए ।