काठमाडौं, ७ साउन-कोरोना भाइरसका कारण विदेशमा अलपत्र ३४ हजारको उद्धार गरेर स्वदेश ल्याइएको कोरोना भाइरस संकट व्यवस्थापन केन्द्रले जनाएको छ ।

मंगलबारसम्म विभिन्न देशबाट ३४ हजारभन्दा धेरै नेपाली स्वदेश फर्किएको केन्द्रले जानकारी दिएको छ । सरकारले कोरोना महामारीका कारण अन्तर्राष्ट्रिय उडान बन्द हुँदा विभिन्न देशमा समस्यामा परेका नेपालीलाई प्राथमिकताका आधारमा उद्धार गरिरहेको छ ।

विभिन्न २५ देशबाट ३४ हजार ९२ जना नेपाली स्वदेश फर्किएको केन्द्रले जनाएको छ । बंगलदेशबाट ८४१ जना, मलेसियाबाट ४ हजार ७७८ जना, माल्दिभ्सबाट ७०९ जना, श्रीलंकाबाट ५ जना, यूएईबाट ७ हजार ६१७ जना, साउदी अरबबाट ५ हजार ६११ जना, सिंगापुरबाट १४६ जना फर्किएका छन् ।

यसैगरी, अफगानिस्तानबाट १८ जना, अस्ट्रेलियाबाट ६३४ जना, ओमानबाट ४९२ जना, कतारबाट ३ हजार ९४१ जना, म्यानमारबाट २६ जना, कुवेतबाट ५ हजार ५ सय ४९ जना, जापानबाट ७५६ जना, थाइल्याण्डबाट ३२६ जना र दक्षिण कोरियाबाट ४७६ जना फर्किएको उद्धार गरिएको केन्द्रले जनाएको छ ।

केन्द्रकाअनुसार, हङकङ्बाट ८९ जना, पाकिस्तानबाट ७२ जना, बहराइनबाट ९ सय ८० जना, अमेरिकाबाट ४ सय २३ जना बेलायतबाट २ सय २९ जना, इजरायलबाट १ सय २७ जना, चीनबाट १ सय ५ जना, टर्कीबाट ३४ जना र फिलिपिन्सबाट १ सय ८ जना गरी जम्मा ३४ हजार ९२ जना स्वदेश फर्किएका हुन् ।

विदेशबाट फर्किएकामध्ये २५ हजार ६६० जना सम्बन्धित प्रदेशमा गएका छन् भने ११ सय ४१ जना होटल क्वारेन्टाइनमा बसेको र ३६ सय २३ जना होम क्वारेन्टाइनमा रहेको केन्द्रले जनाएको छ । फर्किएकामध्ये ५६ जना भने अस्पतालमा उपचाररत छन् ।

उनीहरुमध्ये प्रदेश १ का ७ हजार १९० जना, प्रदेश २ का ५ हजार ७११ जना, वाग्मती प्रदेशका ९ हजार ४०८ जना, गण्डकी प्रदेशका ४ हजार ३८० जना, प्रदेश पाँचका ५ हजार ७५४ जना, कर्णाली प्रदेशका ७४९ जना र सुदूरपश्चिम प्रदेशका ८५५ जना छन् ।